DXXning sobiq binosini TIV rahbari o‘g‘lining kompaniyasi sotib oldi

Tashqi ishlar vaziri o‘g‘li Doniyor Kamilov asoschisi sifatida ko‘rsatilgan Metropol Group kompaniyasi 210 mlrd so‘mga “Sayilgoh"da joylashgan Davlat xavfsizlik xizmatining sobiq binosini xususiylashtirmoqda.

Prezident Andijonga jo‘nab ketdi

Shavkat Mirziyoyev ikki kunlik amaliy tashrif bilan Andijon viloyatiga yo‘l oldi. Tashrif davomida to‘qimachilik, agrosanoat va qishloq xo‘jaligi korxonalari faoliyati bilan tanishish rejalashtirilgan.

Sirdaryoda terrorchilik tashkilotlarini targ‘ib qilganlikda gumonlanayotgan 20 kishi qo‘lga olindi

Sirdaryoda internet orqali ekstremistik va terrorchilik tashkilotlar ta’siriga tushib, radikal g‘oyalarni targ‘ib qilishda gumonlanayotgan 20 kishi qo‘lga olindi. Ularga nisbatan jinoyat ishi qo‘zg‘atildi.

Davlat organlari ochiqligini ta’minlash uchun Antikorrupsiya agentligiga yangi vazifalar yuklatildi

Prezident farmoniga ko‘ra, endilikda Antikorrupsiya agentligi ochiqlikka oid qonunchilik talablarini muntazam ravishda buzayotgan mansabdor shaxslarni javobgarlikka tortish bo‘yicha takliflar kiritadi. Har yil yakunida davlat organlarining Ochiqlik indeksi e’lon qilinadi. Shuningdek, davlat sirlarini saqlash to‘g‘risida qonun loyihasi ishlab chiqiladi.

Davlat organlari ochiqlashi kerak bo‘lgan ijtimoiy ahamiyatga molik ma’lumotlar ro‘yxati

Prezident farmoni bilan davlat organlari va tashkilotlari ochiqlashi kerak bo‘lgan ijtimoiy ahamiyatga molik ma’lumotlar ro‘yxati tasdiqlandi. To‘liq ro‘yxat.

OTMga kirish imtihonlari jarayoni internetda jonli efirga uzatiladi

Endilikda OTMlarning bakalavriat va magistratura imtihonlari, o‘qishni ko‘chirish bilan bog‘liq imtihonlar va nostrifikatsiya test sinovlari jarayonlari internetda jonli efirga uzatiladi.

Ishtixon hokimligi matbuot kotibi jurnalistning “fleshka"sini yemaganligi aytildi

Ishtixon hokimligi matbuot xizmati rahbari jurnalist kamerasining xotira kartasini yeb qo‘ymaganligini ma’lum qildi. “MY5” muxbiri ham bu haqda faqat boshqalardan eshitganligi, o‘zi ko‘rmaganligini ma’lum qildi. Matbuot kotibiga “hayfsan” berildi. Jurnalist esa kamera buzilganligi holati bo‘yicha sudga murojaat qilmasligini bildirdi.

Metro Plaza Toshkentdagi “Gazetalar ishlab chiqarish majmuasi"ni xususiylashtiradi

Toshkent markazidagi gazeta ishlab chiqarish majmuasi binosini sotib olish bo‘yicha tenderda Metro Plaza kompaniyasi g‘olib bo‘ldi. Asoschilar orasida aka-uka Mamasaidovlar va Mirodil Fazilov bor.

“Ayol ishli bo‘lib, kayfiyati yaxshi bo‘lsa, oilasi ham baxtli bo‘ladi” — Shavkat Mirziyoyev

Prezident Shavkat Mirziyoyev Andijon viloyati Izboskan tumanidagi mahsulotlari 100 foiz eksportga yo‘naltirish rejalashtirilgan tikuv-trikotaj korxonasi bilan tanishdi. Fabrikada 830 nafar xotin-qiz ish bilan ta’minlangan. “Qachon Izboskanda mana shunday zamonaviy korxona bo‘lgan? Xotin-qizlarimiz uchun hamma sharoitlarni yaratamiz. Ayol ishli bo‘lib, kayfiyati yaxshi bo‘lsa, oilasi ham baxtli bo‘ladi”, — dedi davlat raxbari.

Quadro IH DMCC “Ichan qal’a” mehmonxonasiga egalik qiladi

Birlashgan Arab Amirliklarining Quadro IH DMCC kompaniyasi poytaxtdagi “Ichan qal’a” mehmonxonasini sotib olish bo‘yicha tenderda g‘olib chiqdi. OAV xabarlariga ko‘ra, mehmonxona ilgari Gulnora Karimovaga tegishli bo‘lgan.

Jahon banki O‘zbekiston soliq sohasidagi islohotlar uchun $60 mln ajratadi

Jahon banki O‘zbekistondagi soliq ma’muriyatchiligi tizimini isloh qilish uchun 60 mln dollar miqdorida imtiyozli kredit ajratadi. Loyiha doirasida Davlat soliq qo‘mitasining operatsion, institutsional va texnologik salohiyatini rivojlantirish hamda iqtisodiyotning norasmiy sektorini qisqartirishga yo‘naltirilgan chora-tadbirlar ko‘riladi.

Deputatlar muhim masalalar bo‘yicha qanday ovoz bergani ochiqlanishi tavsiya etilmoqda

Prezident farmoni bilan Qonunchilik palatasida deputatning har bir qonun (qaror) loyihasini qabul qilish yoki rad etishdagi, senatorning har bir qonunni (qarorni) ma’qullash yoki rad etishdagi ishtiroki to‘g‘risidagi ma’lumotlar ochiqlanib borishi tavsiya etilmoqda.

“Shermatov vaziyatdan foydalanib, „piar“ qilibdilarda bir” — deputat davlat byudjetining tasdiqlanishi haqida

Prezident videoselektorda o‘qituvchilar oylik maoshlarini oshirish zarurligini ta’kidladi. Xalq ta’lim vaziri Sherzod Shermatov “davlat byudjetini tasdiqlovchi ba’zi deputatlar” bundan to‘g‘ri xulosa chiqarishiga umid qilishini yozdi. Qonunchilik palatasi deputati Doniyor G‘aniyev bu jarayon deputatlarga bog‘liq emasligini, Shermatov vaziyatdan foydalanib “piar” qilganligini ta’kidladi.

“Islohotlarning kuchi — mahallada” — Shavkat Mirziyoyev

Prezident Shavkat Mirziyoyev Andijon viloyati Paxtaobod tumanidagi innovatsion issixona va “Rustamjon Zamin rivoji” fermer xo‘jaligi dalasiga tashrif buyurdi. Davlat rahbari “g‘alla hosildorligini 100 sentnerga chiqarish choralarini ko‘rish kerakligini va shunda fermerning ham, ishchilarining ham daromadi oshishini” ta’kidladi. “Yanada ko‘proq ishchi joylar, mahallalarda sharoitlar qilishimiz kerak. Islohotlarning kuchi — mahallada”, — dedi u.

“Yuzga kirguncha yurtboshi bo‘ling” — andijonlik onaxon prezidentni duo qildi

Shavkat Mirziyoyev Andijon viloyatiga tashrifi davomida Izboskan tumanidagi Urganji mahallasida bo‘lib, aholi hayoti bilan tanishdi. Davlat rahbari Qurbonali O‘rinboyev xonadonida bo‘ldi. Mazkur xonadon egasining onasi Sanobar aya O‘rinboyeva prezidentni duo qildi.

BMT davlat to‘ntarishi ishi bo‘yicha qamalgan sobiq diplomat Qodir Yusupovni himoya qilib chiqdi

BMTning O‘zboshimchalik bilan hibsga olish bo‘yicha ishchi guruhi O‘zbekistonni davlat to‘ntarishi to‘risidagi ish bo‘yicha qamalgan sobiq diplomat Qodir Yusupovni zudlik bilan ozod qilishga chaqirdi. Oltita inson huquqlari tashkiloti ham xuddi shu bayonot bilan chiqdi.

Ikki oy ichida 100 mlrd so‘mlik davlat xaridlari tanlovlarida qonun buzilgan — Antikorrupsiya agentligi

Korrupsiyaga qarshi kurashish agentligi tomonidan davlat xaridlariga oid e’lonlar bo‘yicha o‘tkazilgan monitorishda may-iyun oylarida 101,5 mlrd so‘m miqdoridagi 324 ta tanlovda qonun buzilish holatlari aniqlandi. Byudjet buyurtmachilarining 101,5 mlrd so‘mlik 324 ta tanlovini bekor qilish haqida vazirlik va idoralarga 268 ta taqdimnoma kiritildi.

Uzbekistan Airways Hindistonga qatnovlarni kamaytirdi

Uzbekistan Airways aviakompaniyasi 18 iyundan Toshkentdan Dehliga amalga oshiriladigan reyslar sonini qisqartirdi — juma kunli parvozlar bekor qilindi.