10 iyun kuni, Tojikistonga rasmiy tashrifi doirasida Shavkat Mirziyoyev Dushanbe shahridagi «Do‘stiy» maydonida Ismoil Somoniy haykali poyiga gullar qo‘ydi.
Prezident matbuot xizmatining yozishicha, shundan so‘ng «Ko‘hi Borbad» san’at saroyida O‘zbekiston va Tojikiston san’at ustalari ishtirokida konsert bo‘lib o‘tgan.
Tadbirda Tojikiston prezidentining O‘zbekiston prezidenti Shavkat Mirziyoyevni ikki mamlakat o‘rtasidagi hamkorlikni rivojlantirish yo‘lidagi ulkan xizmatlari uchun Tojikistonning yuksak mukofoti — I darajali «Zarrintoj» ordeni bilan mukofotlash to‘g‘risidagi farmoni o‘qib eshittirildi. Ordenni Emomali Rahmon shaxsan o‘zi, tantanali ravishda topshirdi (video).
O‘zbekiston yetakchisi yuksak e’tibori uchun minnatdorlik bildirib, ushbu mukofot katta hurmat va ishonch ifodasi, xalqlarimiz o‘rtasidagi yaxshi qo‘shnichilik rishtalarini mustahkamlash borasidagi birgalikdagi sa’y-harakatlar e’tirofi ekanini ta’kidladi.
Ikki mamlakat yaqin qo‘shni, xalqlarning muqaddas yeriyu suvi, dini bir, tarixi va taqdiri, tashvishu shodliklari mushtarak ekani qayd etildi.
«Bir-birimizni qo‘llab-quvvatlab, o‘zaro manfaatli hamkorligimizni rivojlantirib, katta maqsadlarimizga erisha olamiz. Biz doim bir-birimizga tayanch bo‘lishimiz, har qanday qiyinchilik va sinovlarni yelkama-yelka yengib o‘tishimiz lozim», — dedi Shavkat Mirziyoyev.
Uning so‘zlariga ko‘ra, keyingi yillarda ikki tomonlama munosabatlarda ulkan o‘zgarishlar ro‘y berib, ularni O‘zbekiston va Tojikistondagi millionlab odamlar o‘z kundalik hayotida his etmoqda.
«Bu O‘zbekiston-Tojikiston munosabatlarining yangi modeli, yangi muhitida o‘z aksini topmoqda. Eng muhimi, barcha sa’y-harakatlarimiz va amaliy ishlarimiz xalqlarimiz manfaatlari va orzu-intilishlariga to‘liq mosdir», — dedi davlat rahbari.
O‘zbekiston prezident ikki mamlakat san’at ustalarining bunday konsertlari xalqlar o‘rtasidagi abadiy va samimiy do‘stlikni ifodalovchi yaxshi an’anaga aylangani, san’at xalqlarni yaqinlashtirishda muhim o‘rin tutishini ta’kidlagan.
«Insonga turli chegaralar o‘rnatish xos bo‘lsa, san’at chegara bilmaydi, uning buyuk vazifasi — odamlarni birlashtirish. Mehr-oqibatli bo‘lish, tinch-totuv yashash — xalqlarimizning azaliy orzusi va samimiy intilishidir. Biz ham, ikki davlat rahbarlari — o‘rtamizdagi chegaralar bizni ajratishga emas, faqat birlashtirishiga xizmat qilishi uchun bundan buyon ham harakat qilamiz. Tinchlik va osoyishtalikni asrash, kelajak avlodlar uchun mamlakatlarimizning barqaror va izchil taraqqiyotini ta’minlash — umumiy burchimiz», — dedi Shavkat Mirziyoyev.
Konsert dasturida iste’dodli san’atkorlar ikki xalq madaniyatining boyligi, o‘ziga xosligi va shu bilan birga mushtarakligini namoyish etdilar.
