1 iyun kuni prezident Shavkat Mirziyoyev Surxondaryo viloyatiga tashrifi chog‘ida Sherobod tumanida bunyod etilgan zamonaviy issiqxonaga ham bordi, deb xabar bermoqda «Gazeta.uz» muxbiri.
29 gektarlik issiqxona o‘tgan yili ishga tushirilgan bo‘lib, bu yerda pomidor, bodring, bulg‘or qalampiri, baqlajon kabi bozorbop mahsulotlar yetishtirilmoqda. 200 nafar mahalliy yoshlar esa ish bilan ta’minlangan.
Davlat rahbari issiqxonani ko‘zdan kechirar ekan, mahsulot hajmini ko‘paytirish orqali uning tannarxini arzonlashtirish muhimligini yana bir bor ta’kidladi.
Prezident matbuot xizmatining yozishicha, shu yerning o‘zida «Sherobod anor impeks» korxonasi ham tashkil etilgan. 5 mln dollarlik mazkur loyiha natijasida anorni qadoqlash va qayta ishlash yo‘lga qo‘yilgan. Uskunalar Janubiy Koreya va Sloveniyadan keltirilgan.
Anor bo‘lmagan paytda korxona to‘xtab qolmaydi. Meva-sabzavot va poliz mahsulotlarini saralab, bozorga chiqaradi.
Korxona 6 ming tonna qadoqlash, 2 ming tonna anor sharbati ishlab chiqarish quvvatiga ega. Bu yerda 70 kishi ish bilan ta’minlangan.
Anor mevasi aholi va bog‘dorchilik xo‘jaliklaridan sotib olinadi. Sherobod tumanida bir yilda qariyb 30 ming tonna anor yetishtiriladi. Shundan 8 ming tonnasi eksportga chiqarilmoqda.
Yaqingacha tumanda 2 ming 400 gektar anorzor bor edi. Joriy yilda hosildorligi past bo‘lgan 3 ming gektardan ziyod paxta va g‘alla maydonlari o‘rnida fermer xo‘jaliklari va tadbirkorlar tomonidan anor bog‘lari tashkil etildi. Buning natijasida qo‘shimcha 3 mingta yangi ish o‘rni yaratildi. Uch yildan keyin bu yangi ko‘chatlardan 18 ming tonna hosil olish mumkin. Uning 8 ming tonnasi qayta ishlanishi va 10 ming tonnasi eksport qilinishi rejalashtirilgan.
