Armaniston bosh vaziri Nikol Pashinyan muddatidan oldin parlament saylovlarini o‘tkazish uchun 25 aprel kuni iste’foga chiqdi. Siyosatchining ta’kidlashicha, bu vaqt davomida u Vazirlar Mahkamasi rahbari vazifasini bajarishda davom etadi, deb xabar berdi TASS.
«Prezident va siyosiy kuchlar bilan kelishuvga binoan men bugun 20 iyun kuni muddatidan oldin parlament saylovlarini o‘tkazish uchun iste’foga chiqaman. Parlament ketma-ket ikki marta yangi bosh vazirni saylamaydi, shundan so‘ng qonun chiqaruvchi hokimiyat qonun kuchi bilan tarqatib yuboriladi va muddatidan oldin saylovlar tayinlanadi», — dedi u.
Shu bilan birga, Nikol Pashinyan vaqtinchalik vazifani bajaruvchi maqomiga qaramay, u kabinet rahbari vakolatlarini to‘liq bajarishda davom etishini ta’kidladi. «Muddatidan oldin o‘tkaziladigan saylovgacha men Konstitutsiya va qonunlarga muvofiq bosh vazirning vazifalarini to‘liq bajaraman», — dedi u.
Uning ortidan, texnik protsedura doirasida hukumat ham iste’foga chiqdi.
Vazirlar Mahkamasi rahbari muddatidan oldin parlament saylovlarida «Grajdanskiy dogovor» partiyasidan hukumat rahbari lavozimiga nomzod sifatida qatnashishini qo‘shimcha qildi.
18 mart kuni Nikol Pashinyan respublika prezidenti Armen Sarkisyan va uchta parlament fraksiyalari rahbarlari bilan bo‘lgan maslahatlashuvlardan so‘ng, muddatidan oldin parlament saylovlari 20 iyun kuni bo‘lib o‘tishini e’lon qildi. Istefodan keyin Nikol Pashinyan texnik jihatdan yana o‘z nomzodini ilgari suradi va parlament fraksiyalari yangi bosh vazirni ikki marta saylamaydi. Shundan so‘ng, mamlakat qonunchilik organi tarqatib yuboriladi va respublika prezidenti muddatidan oldin saylovlar o‘tkazish uchun yangi sanani belgilaydi.
Armaniston parlamenti spikeri Ararat Mirzoyan dushanba kuni saylov kodeksiga o‘zgartirish kiritish to‘g‘risidagi qonunni imzoladi. Unga ko‘ra bundan buyon mamlakatda saylovlar proporsional tizim asosida o‘tkaziladi. Hujjat 1 aprel kuni parlament tomonidan ma’qullangan, prezident Armen Sarkisyan uni imzolashdan bosh tortgan, ammo shu bilan birga konstitutsiyaviy sudga yangilikning asosiy qonunga muvofiqligi to‘g‘risida iltimosnoma bilan murojaat qilmagan. Armaniston konstitutsiyasiga ko‘ra, agar prezident qonunni imzolamasa va Konstitutsiyaviy sudga murojaat qilmasa, parlament spikeri davlat rahbari o‘rniga qonunni imzolashi mumkin.
