Saudiya Arabistoni emlanganlarga Ramazon oyida haj ziyoratiga ruxsat beradi
Saudiya Arabistoni Haj vazirligi 5 aprel kuni Ramazon oyida COVID-19 ga qarshi emlangan ziyoratchilar uchun muqaddas joylarni ziyorat qilishga ruxsat berishini ma’lum qildi. Xabarga ko‘ra, ruxsat olishni istaganlar koronavirusga qarshi vaksinasining ikki dozasini olishlari kerak, u maxsus ilovada “emlangan” maqomi asosida beriladi. Ta’kidlanishicha, ushbu holat COVID-19 dan tuzalgandan keyin emlanganlarga ham tegishli. Umra ziyorati, muntazam ravishda ibodat qilish yoki muqaddas joylarni ziyorat qilish uchun ariza berishni xohlovchilar maxsus ilovalarda ro‘yxatdan o‘tib, mavjud vaqt oralig‘ini band qilishlari kerak. Vazirlik, shuningdek, Ramazon oyida ziyoratchilarni Makkadagi Al-Harom masjidiga qabul qilish imkoniyatini oshirishini ta’kidladi. — Al Arabiya News.
Iordaniya prokuraturasi qirolga qarshi fitna haqidagi xabarlarni tarqatishni taqiqladi
Iordaniya poytaxti Ammanning bosh prokurori Hasan al-Abdallat 6 aprel kuni sobiq valiahd shahzoda Hamza ibn Husayn bilan bog‘liq fitna haqidagi har qanday ma’lumotni nashr etishni taqiqladi. “Shahzoda Hamza va boshqalar ishi bo‘yicha maxfiy xizmat tergovini yopiq holda saqlab qolish uchun ushbu bosqich bilan bog‘liq har qanday ma’lumotni tarqatishni taqiqlashga qaror qildik”, dedi Hasan al-Abdallat. Uning aniqlik kiritishicha, taqiq barcha OAV va ijtimoiy tarmoqlarga tegishli. Prokuratura qarorini buzganlar qonuniy javobgarlikka tortiladilar, deya ta’kidlandi.
Iordaniya shahzodasi rasmiylar tomonidan mamlakatdagi vaziyatni beqarorlashtirish uchun xorijiy kuchlar bilan til biriktirganlikda ayblanmoqda. — Al Jazeera.
Belarusning bir qator mamlakatlardagi elchixonalari yopilishi mumkin
Bir qator mamlakatlarda Belarus diplomatik ishtirokining istiqbollari ko‘rinmayapti, dedi Belarus prezidenti Aleksandr Lukashenko 6 fevral kuni xorijiy vakolatxonalar tarmog‘ini optimallashtirish bo‘yicha yig‘ilishda. “Bir qator mamlakatlarda bizning uzoq yillik tajribamiz shuni ko‘rsatadiki, u yerda Belarus diplomatik ishtirokining istiqbollari ko‘rinmayapti. Xo‘sh, nima uchun biz o‘z elchixonalarimizni saqlashimiz, ularni saqlashga byudjet mablag‘larini sarflashimiz kerak? Nimaga to‘xtatib qo‘yilgan sohalarda mas’ul diplomatlarning to‘liq tarkibi kerak? Bunday hollarda, yaqinda Polsha va Litva bilan amalga oshirilganidek, o‘zaro munosabatlar asosida ishlashimiz kerak”, — deya ta’kidladi Lukashenko. Mamlakat rahbarining aytishicha, so‘nggi chora sifatida barcha qiziqtirgan masalalar BMT maydonchalarida, Nyu-York, Jeneva yoki Venadagi boshqa xalqaro tashkilotlarda muhokama qilinishi mumkin. “U yerda butun dunyo bilan muloqot kilish imkoniyati mavjud. O‘zlarining xurofotlari tufayli biz bilan aloqalarni muzlatib qo‘ygan yoki bizga qarshi buzg‘unchi harakatlar olib borayotgan mamlakatlarda siyosiy maslahatchilarni saqlashga hojat yo‘q”, — dedi u. Qaysi davlatlar haqida gap ketayotgani aytilmadi. — BelTA.
Shvetsiya hukumati harbiy ittifoqlarga qo‘shilmaslik siyosatidan voz kechmaslikka qaror qildi
Shvetsiya hukumati harbiy ittifoqlarga qo‘shilmaslik siyosatidan voz kechmoqchi emas, deya ma’lum qildi mamlakat tashqi ishlar va mudofaa vazirlari Ann Linde va Peter Xultkvist. “Noaniqlik davrida biz xavfsizlik siyosatida barqarorlik, uzoq muddatli istiqbolga muhtojmiz. Harbiy ittifoqlardan ozodlik tashqi siyosatda Shvetsiyaning mustaqilligini ta’minlaydi. Shuning uchun hukumatning xavfsizlik siyosati doktrinasi o‘zgarishsiz qolmoqda. Biz harbiy ittifoqlardan ozod bo‘lishdan voz kechmaymiz”, — deyishdi ular. 2020 yil dekabrida parlamentdagi o‘ng markaz partiyalari vakillari hukumatni “xavfsizlik va mudofaa siyosati bo‘yicha hamkorlikni kuchaytirish uchun” “NATO opsiyalari"ni e’lon qilishga chaqirishdi. Ushbu qoidada Shvetsiya harbiy alyansga a’zo bo‘lish uchun ariza berish huquqini saqlab qolganligini anglatadi. Ularning eslatishicha, “bizning Yevropadagi xavfsizlik siyosatining yomonlashuvi” sharoitida Shvetsiya o‘z harbiy salohiyatini bosqichma-bosqich oshirib bormoqda. “2015−2020 yillarda mudofaa byudjetining 25 foizga va 2021−2025 yillarda 40 foizga ko‘payishi nafaqat Shvetsiya uchun, balki tashqi dunyo uchun ham sodir bo‘lgan o‘zgarishlarni haqiqatan ham anglayotganimiz uchun muhim signaldir”, deya ta’kidladi vazirlar. — TASS (Dagens Nyheter).
