Ukrainada Bayden va Poroshenkoga qarshi ikkita jinoiy ish ochildi
Ukrainada mamlakat sobiq prezidenti Pyotr Poroshenko va AQSH prezidenti Jo Baydenga nisbatan sobiq bosh prokurorlardan birining faoliyatiga aralashishda gumon qilinib, ikkita jinoiy ish ochildi. «22 yanvar kuni, AQSH prezidenti lavozimiga kirishganidan ikki kun o‘tgach, Poroshenko va Bayden Ukrainaning sobiq bosh prokurori faoliyatiga aralashganligi to‘g‘risida ikkita yangi jinoiy ish ro‘yxatga olindi», — yozmoqda Poroshenkoning advokati Igor Golovan. Advokat bu ishlarni Radaning (Ukraina parlamenti) fraksiyasi bo‘lmagan deputati Andrey Derkach tashabbusi deb atadi. 2020 yil may oyida Derkach Baydenning Pyotr Poroshenkoga ta’siri haqida guvohlik beradigan audio materiallarni oshkor qildi. Deputat materiallarni jurnalistlardan olganini va Poroshenkoning o‘zi bu audioni yozib olganini ta’kidladi. Bunday xabar tarqalganidan so‘ng, AQSH Rada deputatini mamlakat prezidenti sayloviga aralashgani uchun sanksiyalar ro‘yxatiga qo‘shdi. Keyinroq AQSH Moliya vazirligi Derkachning Rossiya maxsus xizmatlarida 10 yildan ortiq ishlaganligi haqida xabar bergan. Bayden 2016 yilda bosh prokuror Viktor Shokinning ishdan bo‘shatilishi bilan bog‘liq mojaroda ayblanmoqda. Ta’kidlanishicha, AQSH vitse-prezidenti sifatida u Poroshenkoga bosim o‘tkazgan va nazorat bo‘limi boshlig‘ini egallab turgan lavozimidan bo‘shatilishini talab qilgan, aks holda Kiyev Vashingtonning bir mlrd dollarlik kredit kafolatlaridan mahrum bo‘lar edi. — TASS.
Venesuela prezidenti koronavirusga qarshi milliy vaksina ishlab chiqarilishi boshlanganini e’lon qildi
Venesuelada yaratilgan koronavirusga qarshi vaksinaning (Carvativir) ishlab chiqarilishi shu haftada boshlanadi. «Ushbu haftada Lotin Amerikasi, Karib havzasi va butun dunyoga mavjud bo‘lgan kuchli virusga qarshi preparatini ishlab chiqarish boshlanadi», — dedi Maduro Sog‘liqni saqlash bosh shtabi yig‘ilishida. Uning so‘zlariga ko‘ra, Carvativir koronavirus bilan kasallangan bemorlarni davolashda yuqori samarali vositadir. «Aytishim mumkinki, Venesuela va boshqa mamlakatlarning barcha ilmiy muassasalari ishtirokida o‘tkazilgan laboratoriya tekshiruvlarida bemorlarga o‘tkazilgan klinik sinovlardan so‘ng, Carvativir COVID-19ga qarshi kuchli davolash vositasi ekanligi isbotlandi», — dedi prezident. — Telesur.
Avstraliya IIV shaxsiy ma’lumotlari oshkor bo‘lgan qochqinlarga tovon pulini to‘laydi
Avstraliya Ichki ishlar vazirligi tomonidan shaxsiy ma’lumotlari xatolik tufayli jamoatchilikka oshkor qilingan qochqinlar va boshpana izlovchilarga tovon puli to‘lanadi. «Ichki ishlar vazirligi noqonuniy migrantlar uchun shaxsiy lagerlarida 9251 kishining shaxsiy hayotiga aralashgani, ularning shaxsiy ma’lumotlarini oshkor qilgani aniqlandi. Komissar Ichki ishlar vazirligiga voqeada jabr ko‘rganlarga tovon puli to‘lashni buyurdi», — dedi ma’lumotlarni himoya qilish va axborot erkinligi bo‘yicha davlat komissari Anjelina Folk. Departament ma’lumotlariga ko‘ra, shaxsiy ma’lumotlarning tarqalib ketishi Avstraliya Ichki ishlar vazirligi Immigratsiya xizmatining yillik hisobotida migratsion lagerlarda bo‘lgan (2014 yil 31 yanvarda) odamlarning shaxsini aniqlash mumkin bo‘lgan ma’lumotlarga ega bo‘lganligi sababli yuzaga kelgan. Hujjat bo‘limning veb-saytida e’lon qilinib, shaxsiy ma’lumotlar ommaga oshkor bo‘ldi. Ma’lumotlarni muhofaza qilish va axborot erkinligi bo‘yicha komissarning idorasi aniqlik kiritishicha, tovon puli yetkazilgan zararning og‘irligiga qarab belgilanadi, bu 500 avstraliya dollaridan (384 dollar) 20 ming avstraliya dollarigacha (15,3 ming dollar) teng bo‘ladi. Barcha to‘lovlar yaqin 12 oy ichida amalga oshiriladi, dedi Falk. — TASS.
Italiyada mafiyadan 124 mln yevrolik mol-mulk musodara qilindi
Italiya huquqni muhofaza qilish idoralari Kalabriyadagi «Ndrangeta» mafiya guruhi klanining 124 mln yevrolik mol-mulkini musodara qildi. Olib qo‘yilgan aktivlar orasida to‘rtta kompaniya, 67ta bino, 91ta yer uchastkalari, 7ta transport vositalari, 6ta kompaniyaning aksiyalari va 20ta bank va sug‘urta hisob raqamlari bor edi. Xabar qilinishicha, hibsga olingan barcha mol-mulk Piromalli klani bilan aloqada bo‘lganlikda ayblanayotgan to‘rtta tadbirkor nomiga ro‘yxatdan o‘tkazilgan. — ANSA.
Qirg‘iziston sobiq bosh vaziri hibsga olindi
Qirg‘izistonning sobiq bosh vaziri Muhammedkaliy Abilgaziyev noqonuniy boylik orttirganda gumon qilinib, hibsga olingan. «Vazirlar Mahkamasining sobiq rahbari noqonuniy boylik orttirish bo‘yicha jinoiy ish doirasida hibsga olingan. Bugun u so‘roqqa chaqirildi, shundan so‘ng unga shubha bildirishnomasi topshirildi», — deb yozdi nashr. OAV xabarlariga ko‘ra, Abilgaziyev Qirg‘izistondagi eng yirik oltin koni — Qumtor bilan bog‘liq ishda qatnashgan. Abilgaziyev 2018 yildan Qirg‘iziston hukumatini boshqargan, 2020 yil 15 iyunda iste’foga chiqqan. — 24.kg
