Rossiya Ochiq osmon shartnomasidan chiqishini e’lon qildi
Rossiya ishtirokchi mamlakatlarning bir-birining hududi bo‘ylab razvedka parvozlarini amalga oshirishga imkon beradigan Ochiq osmon shartnomasidan (OOSH) chiqish tartib-qoidalarini boshlamoqda. Tashqi ishlar vazirligining so‘zlariga ko‘ra, o‘tgan yili AQSHning kelishuvdan chiqishi ishtirokchi mamlakatlar manfaatlari muvozanatini jiddiy ravishda buzgan. Bo‘limning ta’kidlashicha, Moskva shartnomani amalda saqlab qolish uchun turli xil takliflarni ilgari surgan, ammo ular Vashingtonning kelishuvda qolgan ittifoqchilaridan javob ololmagan. «Shartnomani yangi sharoitlarda davom ettirishdagi to‘siqlarni bartaraf etishda ishlar yurishmaganligi sababli, Rossiya Tashqi ishlar vazirligi Rossiya Federatsiyasining OOSHdan chiqib ketishi bo‘yicha ichki protseduralar boshlanganligi to‘g‘risida e’lon qilmoqda», — deyiladi bayonotda. Protseduralar tugagandan so‘ng, Rossiya depozitariy davlatlarga (Kanada va Vengriya) kelishuv to‘g‘risida rasmiy ravishda xabar beradi. — Rossiya Tashqi ishlar vazirligi.
Pentagon Xitoydan yana to‘qqizta kompaniyani, shu jumladan Xiaomi’ni qora ro‘yxatiga kiritdi
Amerika Mudofaa vazirligi AQSHda faoliyat yuritadigan va Vashingtonning so‘zlariga ko‘ra XXR harbiy sanoati bilan bog‘liq bo‘lgan Xitoy kompaniyalari ro‘yxatini kengaytirdi. Ro‘yxatga yana to‘qqizta tashkilot qo‘shildi, ular orasida Xitoy tijorat aviatsiyasi korporatsiyasi (COMAC) va Xitoyning eng yirik smartfon ishlab chiqaruvchilaridan biri Xiaomi ham bor. «Pentagon kerak bo‘lganda qo‘shimcha tashkilotlarni [qo‘shib] ro‘yxatni yangilashni davom ettiradi», — dedi AQSH departamenti. Ro‘yxat o‘tgan yilning iyun oyida AQSH Kongressiga yuborilgan. Uning tarkibiga 20 ta kompaniya, shu jumladan Huawei ham kiritilgan edi. Keyinchalik ro‘yxat bir necha bor to‘ldirildi. Ro‘yxat AQSHda 1999 yilda qabul qilingan qonun talablariga muvofiq tuzilgan. Unga kiritish avtomatik ravishda sanksiyalarni keltirib chiqarmaydi, ammo ushbu qonunga binoan AQSH prezidenti unda ishtirok etayotgan kompaniyalarga cheklovlar qo‘yishi mumkin. — AQSH Mudofaa vazirligi.
Argentina prezidenti abortga ruxsat berish to‘g‘risidagi qonunni imzoladi
Argentina prezidenti Alberto Fernandes 15 yanvar kuni abortni qonuniylashtirish to‘g‘risidagi hujjatga imzo chekdi. «Ko‘p ayollar uchun bugun, ular abortni jinoyat deb hisoblamaslikka urinishgan uzoq muddatli kurashning oxiri», — dedi Argentina rahbari prezident saroyida bo‘lib o‘tgan marosimda. Fernandes shuningdek, homiladorlik paytida va bola hayotining dastlabki uch yilida ayollarni qo‘llab-quvvatlashga qaratilgan qonunni imzoladi. «Biz jamiyatimiz biroz teng huquqli bo‘lishi uchun muhim qadam tashladik», — dedi prezident. Dekabr oyi oxirida Argentina parlamentining ikkala palatasi homiladorlik muddati 14 haftagacha bo‘lgan, tibbiy ko‘rsatmalarsiz abort qilishga ruxsat beruvchi qonun loyihasini yoqlab, ovoz bergan edi. — TASS.
Belarusda yil boshidan beri birinchi o‘lim jazosi
Joriy yilning boshidan beri Belarusda birinchi o‘lim jazosiga hukm o‘qildi. Slutskdagi Minsk viloyat sudi ikki nafaqaxo‘rni o‘ldirish va 85 yoshli ayolni o‘ldirishga urinishda ayblangan uch kishini sud qildi. Sudlanuvchi Vitaliy Skrundik o‘limga, sheriklari esa 22 va 18 yilga qattiq rejimdagi koloniyada jazo o‘tashga hukm qilinishdi. Tergov ma’lumotlariga ko‘ra, sudlanuvchilar avval qariyalarni bo‘g‘ib o‘ldirgan, so‘ngra ularni yoqib yuborishgan. — Vesna.
