14 dekabr kuni «Elektron turdagi sug‘urta xizmatlarini ko‘rsatish tartibini takomillashtirish bo‘yicha qo‘shimcha chora-tadbirlar to‘g‘risida"gi Hukumat qarori qabul qilindi. Unga ko‘ra, transport vositalari egalarining fuqarolik javobgarligini majburiy sug‘urta qilish bo‘yicha qoidalar tasdiqlandi, deya xabar berdi Huquqiy axborot Telegram kanali.
Qarorga muvofiq, elektron turdagi sug‘urta xizmatlari (Ye-polis) yagona axborot tizimi tarkibida amalga oshiriladi.
2021 yil 1 iyulgacha yagona axborot tizimi tarkibida Ye-polislarni sotish va rasmiylashtirish bo‘yicha tegishli axborot modullari joriy etiladi.
Qaror bilan Transport vositalari egalarining fuqarolik javobgarligini majburiy sug‘urta qilish bo‘yicha Ye-polisni sotish, rasmiylashtirish va ularning haqiqiyligini tekshirish qoidalari tasdiqlandi.
Unga ko‘ra, Ye-polisni sotish, rasmiylashtirish elektron ma’lumot almashish orqali sug‘urta qildiruvchi bilan sug‘urta tashkiloti o‘rtasida amalga oshiriladi.
2021 yil 1 martdan Moliya vazirligi sug‘urta tashkilotlari bilan birgalikda Transport vositalari egalarining fuqarolik javobgarligini majburiy sug‘urta qilish bo‘yicha Ye-polisni sotish, rasmiylashtirishni amalga oshiradi.
Ye-polis qog‘oz shaklidagi shartnomaga (polisga) tenglashtirildi.
