O‘zbekistonda ekologiya va atrof-muhitni muhofaza qilish, shuningdek chiqindilarni yo‘q qilish sohasidagi ba’zi qonunbuzarliklar uchun jarimalar miqdori oshirildi. Bu haqda prezident tomonidan 3 dekabrda imzolangan qonun hujjatlariga o‘zgartish va qo‘shimchalar kiritish to‘g‘risidagi qonunda nazarda tutilgan.
4 dekabrdan boshlab, yong‘inga ehtiyotsizlik bilan munosabatda bo‘lish natijasida katta miqdorda zarar keltiradigan ekologik qoidabuzarliklar uchun 50 dan 100 BHM gacha jarima yoki 240 soatgacha majburiy jamoat ishlari yoki 1 yilgacha axloq tuzatish ishlariga jalb qilinishi mumkin.
Bundan tashqari, o‘rmonlarni, daraxtlarni yoki boshqa o‘simliklarni noqonuniy ravishda kesganlik uchun 100 dan 150 gacha BHM yoki jamoat ishlari uchun 240 soatdan 300 soatgacha jarima yoki 1 yildan 2 yilgacha axloq tuzatish ishlari, yoki ozodlikni 1 yildan 3 yilgacha cheklash, 3 yilgacha ozodlikdan mahrum qilish (ilgari jarima miqdori 50 dan 75 BHMgacha, qolganlari o‘zgarishsiz) kabi jazo qo‘llaniladi.
Ekinlarga, o‘rmonlarga, daraxtlarga yoki boshqa o‘simliklarga qasddan zarar yetkazish, yo‘q qilganlik uchun — 150 dan 200 BHM gacha jarima yoki 300 soatdan 360 soatgacha jamoat ishlariga jalb qilish, yoki 2 yildan 3 yilgacha axloq tuzatish ishlari yoki 1 yildan 3 yilgacha ozodlikni cheklash; 3 yilgacha ozodlikdan mahrum qilish (ilgari jarima miqdori 75 dan 100 BHMgacha, qolganlari o‘zgarishsiz) kabi jazolar belgilanadi.
Ushbu cheklovlar atrof-muhitga 300 dan 500 BHM gacha bo‘lgan miqdorda zarar yetkazilganida qo‘llaniladi.
Avvalroq, Davlat ekologiya qo‘mitasi tomonidan yil boshidan beri olib borilgan atrof-muhitni muhofaza qilishni nazorat qilish davomida 37 mingdan ortiq qonunbuzarliklar aniqlangani va tabiatga yetkazilgan zarar hajmi 15 mlrd so‘mdan ortiq deb baholanayotgani haqida xabar bergan edik.
