O‘zbekistonning bir necha hududlarida aholi sinov tariqasida ro‘yxatga olinadi. Bu haqda tegishli hukumat qarori qabul qilindi.
Ushbu qaror bilan O‘zbekistonda 2023 yilda aholini ro‘yxatga olishga tayyorgarlik ko‘rish va uni o‘tkazish tartibi to‘g‘risidagi nizom tasdiqlandi.
Qarorga ko‘ra, 2021 yil 1−25 noyabrda Andijon viloyati Xo‘jaobod tumani, Toshkent viloyati Yuqori Chirchiq tumani, Xiva shahri hamda Toshkent shahri Yashnobod tumanlarida aholi sinov tariqasida ro‘yxatga olinadi.
Butun aholini ro‘yxatga olish esa 2023 yil 1−25 noyabrda quyidagicha amalga oshiriladi:
- 1−5 noyabrda aholi internet tarmog‘i orqali ro‘yxatga olinadi;
- 6−10 noyabrda internet orqali ro‘yxatga olingan respondentlar va ularning uy manzillari ro‘yxati shakllantiriladi;
- 11−22 noyabrda aholini ro‘yxatga olish varag‘i shakllari asosida uyma-uy yurib aholi ro‘yxatga olinadi;
- 23−25 noyabrda har bir uchastkadagi uy-joy manzillarining 10 foizi tanlanma ravishda nazorat kuzatuvi asosida o‘rganiladi.
Qaror bilan aholini ro‘yxatga olish jarayonlariga jalb etiladigan shaxslarga haq to‘lash tartibi va miqdorlari tasdiqlandi.
Eslatib o‘tamiz, bundan avval O‘zbekiston aholisini ro‘yxatga olish muddati 2022 yildan 2023 yilga qoldirilganligi haqida xabar bergan edik.
