Belarus huquqni muhofaza qilish idoralari tartibsizliklarni tashkillashtirganlar va ularda ishtirok etganlarga nisbatan 500 dan ortiq jinoiy ish qo‘zg‘atdi, dedi Belarus Bosh prokuratura rahbari o‘rinbosari Andrey Serbun. Unga ko‘ra, ularning aksariyati Minskdagi norozilik namoyishlari bilan bog‘liq, deya xabar berdi TUT.BY portali.
Andrey Serbun, shuningdek, «har bir huquqbuzar aniqlanadi va uning harakatlariga tegishli huquqiy baho beriladi» deya ta’kidladi. Bosh prokuratura vakilining aytishicha, norozilik harakati radikallashmoqda. Uning so‘zlariga ko‘ra, noqonuniy xatti-harakatlar natijasida yetkazilgan zarar miqdori 18 ming rubldan oshgan, ularning 15 mingi allaqachon qoplangan.
Xavfsizlik kuchlarining shafqatsiz harakatlaridan jabr ko‘rgan fuqarolarning bayonotlari bo‘yicha jinoiy ishlarga kelsak, hammasi tekshiruv bosqichida, deya qayd etmoqda portal.
«Har bir murojaat Jinoyat-protsessual kodeksi talablariga muvofiq tekshiriladi. Ushbu tekshiruv jarayonida ariza beruvchining ichki ishlar idoralari xodimlarining harakatlarining noqonuniyligi to‘g‘risida bergan dalillarini o‘rganishdan tashqari, ushbu vaziyatda ariza beruvchi harakatlarining qonuniyligi ham tekshiriladi», — dedi Andrey Serbun.
«Maqsad markazni egallash edi — bunga yo‘l qo‘ymadik. Biz politsiya bo‘limlariga bordik, eng dahshatlisi, yashash joylariga bordik. Qorong‘i, odamlar qo‘rqib qolgan. Kimdir soat yettida bolalar bilan ko‘chaga chiqdi. Olomon mast, aqldan ozgan, giyohvand moddalar iste’mol qilgan, chekkan bo‘lishi odatiy holmi? Yuzlab odamlar bu yerga oshiqishardi. Politsiya nima qilishi kerak edi? Bu mening odamlar xavfsizligini ta’minlash uchun bergan buyrug‘im edi. Xonadonlarga kirishga to‘g‘ri keldi, u yerdan bu giyohvandlarni olib chiqishlari kerak edi», — dedi prezident Aleksandr Lukashenko «xalqning ultimatum» muddati tugagan kuni bo‘lib o‘tgan namoyishlar to‘g‘risida.
Dushanba kuni, «xalq ultimatumidan» keyingi birinchi kun Belarus bo‘ylab norozilik aksiyalari bo‘lib o‘tdi. Ertalab xavfsizlik xodimlari yirik korxonalarning nazorat punktlarida navbatchilik qilishdi va ish tashlashni istayotganini e’lon qilgan va ularni qo‘llab-quvvatlash uchun kelgan ishchilarni hibsga olishdi, universitetlar talabalarini tarqatib yuborishdi, birdamlik zanjiriga qo‘shilgan texnologiyalar parkidagi IT-mutaxassislarini qo‘lga olishdi va kechqurun ko‘chalar va maydonlarni namoyishchilardan tozalashdi. «Vesna» inson huquqlari markazining ma’lumotlariga ko‘ra, kun davomida 300 dan ortiq odam hibsga olingan.
