Sog‘liqni saqlash vazirligi Navoiy viloyatida koronavirusga chalinish holatlari soni ortganini xabar qildi.

Vazirlik ma’lumotlariga ko‘ra, bugun kun davomida koronavirus infeksiyasi aniqlanganlar 61 nafarni tashkil qilmoqda. 39 ta holat aholi orasida qayd etilgan bo‘lsa, bemorlarning 24 nafari Samarqand, 15 nafari Navoiy viloyatlariga to‘g‘ri kelmoqda. Hozirda ushbu bemorlar bilan muloqotda bo‘lgan barcha fuqarolar belgilangan tartibda qat’iy karantinga olingan.

Ayni paytda Navoiy viloyatida 66 nafar koronavirusga chalingan bemorlar qayd etilib, ularning barchasi ushbu hududda kasallikka chalingan, ularning orasida xorijdan kelganlar yo‘q. Shundan 2 nafari sog‘aygan bo‘lsa, qolgan 64 nafari davolanmoqda (infografikaga qarang). Navoiy viloyati bor yo‘g‘i 3 foiz sog‘ayish ko‘rsatkichi bilan kasallikdan davolanish bo‘yicha mamlakatimizda eng so‘nggi o‘rinda bormoqda. Vaholanki, yurtimizda sog‘ayish ko‘rsatkichi 81 foizdan oshgan.

Karantin qoidalariga qat’iy rioya etilmaganligi oqibatida viloyatda so‘nggi ikki haftada kasallikka chalinganlar soni keskin oshdi. Misol uchun, 20 may kuni 17 nafar, 21 may kuni 5 nafar qayd etilgan bo‘lsa, bugun soat 10.00 holatiga yana 15 nafar fuqaroda kasallik tasdiqlanib, viloyatda so‘nggi uch kunda virus yuqtirganlar 37 nafarga ko‘paydi. Kasallik tarqalishining asosiy o‘chog‘i Zarafshon shahri bo‘lib turibdi.

Shundan kelib chiqqan holda, Navoiy viloyati, shuningdek, boshqa koronavirus infeksiyasiga chalinganlar aniqlanayotgan boshqa hududlarda karantin qoidalarini kuchaytirish, Milliy gvardiya, Mudofaa va Ichki ishlar vazirligi xodimlari hamda mahalliy xokimlik vakillari bilan birgalikda koronavirus infeksiyasi tarqalishining oldini olish, bemorlarni samarali davolash hamda karantindagi fuqarolarni tibbiy kuzatuvga olishni yanada samarali yo‘lga qo‘yish borasida izchil faoliyat olib borilmoqda.

Vazirlik nafaqat Navoiy yoki Samarqand viloyatlari, balki barcha hududlaridagi aholi ham xushyor bo‘lishlari, bundan to‘g‘ri xulosa chiqarishlari kerakligini ta’kidladi.


Sog‘liqni saqlash vazirligi, yana bir bor, karantin qoidalariga, jumladan, ijtimoiy masofani saqlash, jamoat joylarida to‘planmaslik, qo‘llaringizni tez-tez va yaxshilab yuvish, qo‘lni ko‘krakka qo‘yib salomlashish, tibbiy niqob taqishda davom etish kabi qoidalarga qat’iy amalga qilishlarini so‘radi.

«Shuningdek, muborak Ramazon hayiti bayrami arafasidamiz. Ushbu muqaddas kunda guruh-guruh bo‘lib, xonadonma-xonadon yurishlarni cheklash, turli marosimlarni o‘tkazmaslikni qat’iy so‘rab qoladi. Chunki atrofimizda kasallikka chalinganlar yo‘qligiga hech kim kafolat bera olmaydi. Demak, siz ham kasallikka chalinishingiz, uyga kelib, oila a’zolaringizga yuqtirishingiz ehtimoli катtaлигини aslo unutmang. Bu esa juda jiddiy oqibatlarga sabab bo‘lishi mumin», — deyiladi xabarda.