Xorijda bo‘lib turgan O‘zbekiston fuqarolar uchun konsullik ro‘yxatidan elektron tarzda o‘tish imkoni yaratildi. Bu haqda Adliya vazirligi matbuot xizmati xabar qildi.

O‘zgarishlar 10 fevral kuni Adliya vazirligi tomonidan ro‘yxatga olingan «Xorijda bo‘lgan (bo‘lib turgan) O‘zbekiston Respublikasi fuqarolari va fuqaroligi bo‘lmagan shaxslarning konsullik ro‘yxatini yuritish tartibi to‘g‘risidagi yo‘riqnomani tasdiqlash haqida"gi buyruqda o‘z aksini topgan.

Buyruq bilan tasdiqlangan yo‘riqnomaga ko‘ra, endilikda xorijda doimiy yashayotgan yoki vaqtincha bo‘lib turgan O‘zbekiston fuqarolari va fuqaroligi bo‘lmagan shaxslar uchun interaktiv konsullik xizmatlari www.consulate.mfa.uz veb-portali orqali ham doimiy yoki vaqtincha konsullik ro‘yxatidan o‘tish imkoni yaratildi.

Bunda, konsullik ro‘yxatidan o‘tish uchun kerak bo‘lgan hujjatlarning «PDF» formatda skaner qilingan nusxalari tizimga joylashtiriladi.

Hujjatlar taqdim etilgan vaqtning o‘zida konsullik mansabdor shaxsi portal orqali ro‘yxatga olingan shaxslarning elektron pochta manziliga konsullik ro‘yxatiga olinganlik to‘g‘risidagi tegishli xabarnomani jo‘natadi.

Buyruq rasmiy e’lon qilingan kundan e’tiboran kuchga kiradi.

Avvalroq mamlakatning xorijdagi konsullik muassasalari orqali O‘zbekiston fuqarolariga xorijga chiqish biometrik pasportini berish tartiblari belgilangan edi. Unga ko‘ra, fuqarolar xorijga chiqish pasportini olish va almashtirish uchun konsullik ro‘yxatida turishlari lozim.