O‘zbekiston prezidenti Shavkat Mirziyoyev 3 dekabr kuni Tojikiston poytaxti — Dushanbe raisi Rustam Emomalini qabul qildi, deya xabar berdi davlat rahbari matbuot xizmati.
Uchrashuv avvalida davlatimiz rahbari O‘zbekiston va Tojikiston o‘rtasidagi do‘stlik va yaxshi qo‘shnichilik munosabatlari keyingi yillarda izchil rivojlanib borayotganini mamnuniyat bilan qayd etdi.
Ikki qardosh mamlakat rahbarlarining siyosiy irodasi tufayli ko‘p qirrali hamkorlikni sifat jihatidan yangi bosqichga olib chiqish ta’minlangani, O‘zbekiston va Tojikiston o‘rtasida strategik sheriklik yo‘lga qo‘yilgani alohida ta’kidlandi.
Dushanbe raisi Rustam Emomali qabul uchun samimiy minnatdorlik bildirib, Tojikiston prezidenti Emomali Rahmonning salomi va eng ezgu tilaklarini yetkazdi.
Uchrashuvda mamlakatlar poytaxtlari Toshkent va Dushanbe o‘rtasida o‘zaro manfaatli hamkorlikni kengaytirishning amaliy jihatlari muhokama qilindi.
Shaharni boshqarish va infratuzilmani rivojlantirish, «yo‘l xaritasi» asosida qo‘shma kooperatsiya loyihalari va madaniy-gumanitar hamkorlik dasturlarini amalga oshirish kabi yo‘nalishlarda muntazam muloqotni yo‘lga qo‘yish masalalariga alohida e’tibor qaratildi.
