Oliy Majlisning inson huquqlari bo‘yicha vakili (ombudsman) tomonidan shakllantirilgan monitoring guruhi 21 oktyabr kuni sud qarori bilan Xorazm viloyatidagi ruhiy kasalliklar dispanserida 26 sentyabrdan buyon majburiy davolanishda bo‘lib turgan Nafosat Ollashukurova bilan ko‘rishish uchun bordi.
Ombudsman saytida yozilishicha, guruhga Ombudsman vakillaridan tashqari O‘zbekiston Xotin-qizlar qo‘mitasi vakillari, «Ezgulik» inson huquqlari jamiyati yetakchisi Abdurahmon Tashanov va «Najot» huquqni himoya qilish tashkilot rahbari Xayitboy Yoqubov, shuningdek, psixiatriya sohasidagi ekspertlar kiritilgan. Uchrashuvda Nafosat Ollashukurovaning tug‘ishgan akasi Tojimurod ham ishtirok etdi.
«Monitoring guruhi N. Ollashukurova nisbatan barqaror ruhiy holatda ekanligi va muloqotni davom ettirishga qodir ekaniga aniq ishonch hosil qildi. Suhbat davomida u tibbiyot muassasasi xodimlarining ijobiy munosabati va unga hech qanday ruhiy yoki jismoniy ta’sir ko‘rsatilmaganini ta’kidladi. N. Ollashukurova uning ma’muriy javobgarlikka tortilishiga asos bo‘lgan xatti-harakatlaridan afsusda ekanini bildirdi», — deyiladi ombudsman idorasi bayonotida.
Tibbiyot xodimlari tomonidan Nafosat Ollashukurovaning kasallik tarixi o‘rganilganida, «tashhis ruhiy holat buzilishi tashhislarini Xalqaro kasalliklar va salomatlik bilan bog‘liq bo‘lgan muammolar tasnifi mezonlariga mos kelishi hamda davolanish klinik alomatlarga muvofiq tayinlanganini» ko‘rsatdi.
Mutaxassislar «bemorning ahvoli sezilarli yaxshilanganini» ta’kidladilar, ammo «depressiya alomatlari mavjudligi va belgilangan davolanish kursini davom ettirish zarurligini» ta’kidladilar. Dispanserda shifokorlar ko‘rsatmalarida odamning aqliy faoliyatini susaytiradigan kuchli ta’sir ko‘rsatuvchi dorilar yo‘q edi, deyiladi xabarda.
Nafosat Ollashukurova ota-onasi bilan telefon orqali suhbatlashdi va «ularga o‘zini qanday his etayotgani, saqlash sharoitlarining qulayligi va tibbiyot xodimlarining unga nisbatan hurmatli munosabati to‘g‘risida ma’lumot berdi».
Shu bilan birga, suhbat chog‘ida u «o‘zining moddiy yetishmovchiligi darajasidan tashvish bildirib, davolanishni tugatgandan so‘ng ish topish istagini bildirdi», deyiladi xabarda.
Bloger Nafosat Ollashukurova (Facebook`da — Shabnam Olloshkurova) 23 sentyabr kuni o‘z qarindoshlari bilan Toshkentga piyoda yo‘lga chiqqan jurnalist Mahmud Rajab bilan birgalikda 10 kun muddatga ma’muriy qamoqqa hukm qilingan edi. va sud qarori bilan ruhiy kasalliklar dispanseriga joylashtirildi.
26 sentyabrda Nafosat Ollashukurova ma’muriy qamoq jazosini o‘tayotgan paytida ruhiyatida o‘zgarishlar sezilganligi uchun tez tibbiy yordam chaqirtirilgan. Psixiatrning tavsiyasi bilan u Xorazm viloyat ruhiy asab kasalliklari dispanserida ko‘rikdan o‘tkazish uchun olib ketilgan.
Mahmud Rajabov 10 kun hibsda bo‘lganidan keyin qo‘yib yuborilgan. 18 oktyabr kuni sud uni jamoat xavfsizligi va jamoat tartibiga tahdid soluvchi materiallarni tarqatishda va kontrabanda bilan shug‘ullanganlikda aybdor deb topdi hamda uni 2,5 yil sinov muddati bilan 5,5 yil shartli qamoq jazosiga hukm qildi.
