“Aliyev Zargari” (Gold Center) kompaniyasi rahbari Ahmed Aliyev 21-oktyabr kuni Toshkentda o‘tkazgan matbuot anjumanida qanday qilib biznesidan mahrum etilgani, soxta ayblovlar bilan “Jasliq” qamoqxonasida jazo o‘tagani hamda 2012-yilda O‘zbekistonda davlat to‘ntarilishiga tayyorgarlik ko‘rilgani to‘g‘risida so‘zlab berdi.
2012-yilda Ahmed Aliyev, uning turmush o‘rtog‘i Mehribon Aliyeva va sheriklariga (jami 11 kishi) nisbatan Jinoyat kodeksining 23 ta moddasi bo‘yicha jinoyat ishi qo‘zg‘atilib, ayblov e’lon qilingan.
2013-yilda jinoyat ishlari bo‘yicha Toshkent shahar sudi Aliyevni barcha 23 ta modda (jumladan, qiynoqlar, qotillik tahdidi, noan’anaviy tarzda zo‘rlashga urinish, talonchilik, sud qaroriga rioya qilmaslik, militsiyaga xabar bermaslik, qurolli guruh tuzish, garovga olish, qurol va o‘q-dorilarni saqlash va boshqalar) bo‘yicha aybdor deb topib, 20 yil muddatga ozodlikdan mahrum etish to‘g‘risida qaror qabul qildi. Uning yana 9 nafar xodimi qamoq jazosiga hukm qilindi, xotiniga esa shartli hukm chiqarildi.
Ahmed Aliyevning so‘zlariga ko‘ra, u ikki sababga ko‘ra qamalgan — iqtisodiy va siyosiy.
“Men va mening ishchilarim 2012-yilda hibsga olingach, hamma uni Gold Center bilan bog‘ladi. Darhaqiqat, bu ham sabab, ammo ikkilamchi. Asosiy sabab siyosiy ahamiyatga ega. 2011−2012-yillarda, mening fikrimcha, O‘zbekistonda Islom Abdug‘aniyevich Karimovni lavozimidan chetlashtirish, shuningdek, ta’kidlaymanki, bosh vazir — hozirgi xalq prezidenti Shavkat Miromonovich Mirziyoyevni jismonan yo‘q qilish orqali davlat to‘ntarilishiga tayyorgarlik ko‘rildi”, — dedi u.
Tadbirkorning so‘zlariga ko‘ra, hibsga olinishidan oldin unga O‘zbekistonda zargarlik biznesini rivojlantirish konsepsiyasini ishlab chiqish, bu sohadagi muammolar va ularni hal qilish yo‘llarini ko‘rsatishni so‘rashgan. Uning hisob-kitoblariga ko‘ra, O‘zbekiston har yili 15 tonna oltin import qilgan. Ahmed Aliyevning taxminicha, oltinning asosiy qismi kontrabanda yo‘li bilan olib kelingan.
“Mazkur konsepsiya mening hibsga olinishimga turtki berdi”, — dedi ishonch bilan u.
Zargar sud qarorlari, tergovlardagi xatolar va unga qarshi uyushtirilgan fitna “Oltin Markaz"i binosining tortib olinishiga olib kelganini ta’kidladi. Kompaniya Universal Invest bilan (uning “Kapitalbank"ka tegishli ekani aytiladi) 5 milliard so‘mlik lizing shartnomasiga ega edi, ammo bir muncha vaqt o‘tgach, to‘lovlar muddati buzila boshladi, shu sababli Universal Invest xo‘jalik sudiga Aliyevning kompaniyasiga qarshi da’vo bilan murojaat qildi.
Tadbirkor muddatlarning kechikishiga ijarachilar tomonidan ijara shartnomalarining bekor qilinishi natijasida daromadlarning pasayishi sabab bo‘lganini ma’lum qildi. Ahmed Aliyevning ta’kidlashicha, zargarlik do‘konlarining “Milliy xavfsizlik xizmati, Bosh prokuratura va Ichki ishlar vazirligi tomonidan noqonuniy ravishda yopilishi” bilan bog‘liq voqealar ularning ketishiga ta’sir qildi.
To‘lov muddatlari buzilgani sababli sud kompaniyalar o‘rtasidagi shartnomani bekor qilishga qaror qildi. Shu bilan birga, zargarning ta’kidlashicha, “Agrobank” qarzni sotib olishga harakat qildi, shundan so‘ng u tanishlaridan qarz olib, kreditni muddatidan oldin yopishga harakat qildi, ammo bu bilan “Oltin Markazi"ni olishdan manfaatdor bo‘lgan odamlarga qarshilik qilindi. Sababi — bino mol-mulklari bilan 23 milliard so‘mga baholangan, qarz esa 5 milliard so‘mga teng edi.
“Kreditning qolgan qismini qaytarib olgandan ko‘ra, binoni olib qo‘yish ular uchun foydaliroq edi”, — deydi zargar.
Matbuot anjumanida Ahmed Aliyev sudda uchrashishni rejalashtirgan “Kapitalbank” rahbariyati vakilining ishiga aloqadorligini ma’lum qildi. Biroq, tadbirkor Bahrom Qodirov va “huquq-tartibot idoralarining o‘zboshimchaliklaridan omon qolgan” yana bir kishi vakilni himoya qilib chiqdi.
Chapdan o‘ngga: yozuvchi va jurnalist Aydin Gudarzi; “Veri Bliss” kompaniyasining bosh direktori Yenisey Kan, Ahmed Aliyev, Mehribon Aliyeva, haydovchi Said Nabixodjayev.
Ahmed Aliyevning so‘zlariga ko‘ra, Rahim Mamajonov MXX raisining sobiq birinchi o‘rinbosari Shuxrat G‘ulomov nomidan (hozirda umrbod qamoq jazosini o‘tamoqda) tadbirkorga zargarlik markazi binosini topshirishni va uni maosh evaziga boshqarishni taklif qilgan.
“Menga 5000 AQSH dollar maosh taklif qilishdi. Ular: „Biz sendan Gold Center`ni olamiz, sen boshliq sifatida ishlash uchun u yerda qolasan, biz konsepsiyangni oxirigacha yetkazamiz, balki u yerdan 1−2 foizi senga bo‘ladi“, deyishdi”, — dedi tadbirkor.
Bundan tashqari, uning ta’kidlashicha, Rahim Mamajonov davlat to‘ntarilishi rejalashtirilayotgani haqida ma’lum qilgan. Ahmed Aliyev bu rejalar haqida Shavkat Mirziyoyevga aytib berishni maqsad qiladi.
Biroq tadbirkor Qozog‘iston-O‘zbekiston chegarasida qo‘lga olinadi. Uning so‘zlariga ko‘ra, o‘sha paytda u italiyalik sherigi bilan uchrashish uchun Chimkentga ketayotgan edi. Tadbirkor MXX tergov hibsxonasiga jo‘natiladi. Hibsga olinganidan bir necha kun o‘tgach, Ahmed Aliyev mahbuslar bilan kameraga joylashtiriladi va u yerda “tergov foydasiga dalillarni kaltaklanadi”.
To‘rt kun o‘tgach, u tergov hibsxonasida MXX rahbariyati bilan uchrashishga muvaffaq bo‘ladi.
“Meni taklif qilishdi. Qarasam, meni bojxonada hibsga olgan to‘rt kishining kattasi o‘tiribdi. U bilan shunday takabbur, ko‘rinishidan eng kamida polkovnik bo‘lgan betgachopar bir odam o‘tirgandi. Menda milliy ahamiyatga ega ma’lumotlar bor, deyman. Men hali ismimni aytmayman va u menga: „Ey, sen ozar, Rahimni eshitmadingmi? Uni eshitsayding, hozir bunaqa ahvolda bo‘lmasding“. Men ismini aytmayman, lekin u muzokarachining ismini aytadi. Buni qanday tushunish kerak?” — deb so‘raydi u.
Tergov davomida guvohlar, tadbirkorning so‘zlariga ko‘ra, qiynoq va qiynoq ostida yolg‘on ko‘rsatmalar bergan. Natijada, Ahmed Aliyev 20 yilga “Jasliq"qa qamaldi.
“Men “Jasliq"qa o‘tdim. U yer insonning barcha huquqlari toptalgan konslager. Ovqatlanish me’yorlari buzilgan, tibbiyot juda past darajada edi. Mahbuslar xo‘rlangan, kaltaklangan va qiynoqqa solingan. Ularga advokatlar bilan uchrashuvga ruxsat berilmagan”, — deydi u.
Mahbuslarning 50 foizga yaqini — “Jasliq"qa soxtalashtirilgan ishlar bo‘yicha joylashtirilgan tadbirkorlardir, deydi Gold Center`ning sobiq rahbari.
2019 yil sentyabr oyida 7,5 yillik qamoqdan so‘ng Jinoyat ishlari bo‘yicha Toshkent viloyat sudi Aliyevning ishini qayta ko‘rib chiqdi va uni sud zalida qamoqdan ozod qildi. U Jinoyat kodeksining 14 ta moddasidan 5tasida aybsiz deb topildi. Ahmed Aliyev Jinoyat kodeksining qolgan 9 ta moddasi bo‘yicha bahslashib, to‘liq oqlanishni rejalashtirmoqda.
“Gazeta.uz” Ahmed Aliyev nutqining videoyozuvini keyinroq e’lon qiladi.
