Prezident Shavkat Mirziyoyev 12 iyul kuni Toshkent qishloq xo‘jaligi texnikasi zavodiga tashrif buyurdi, deya xabar qildi davlat rahbari matbuot xizmati.
Prezident tashrifi bu zavodga katta o‘zgarishlar olib keladi. Uning negizida yangi zavodlar ishga tushirilib, tom ma’noda qishloq xo‘jaligi mashinasozligi sanoati barpo etiladi, deyiladi xabarda. Jumladan, lokalizatsiya darajasini oshirib, importni qisqartirish maqsadida bu yerda 5 ta korxona tashkil etish rejalashtirilgan. Ulardan biri umumiy qiymati 42 million dollar bo‘lgan metall quyish korxonasidir. Zavodning 3 gektarlik bo‘sh turgan binosida tashkil etiladigan korxonada yiliga 47 ming tonna xalqaro talablarga javob beradigan, yuqori aniqlikdagi metall qismlar quyiladi.
Davlat rahbari ushbu korxona uchun mo‘ljallangan binoni kirib ko‘rdi.
«Mashinasozlik korxonalari uchun metall quyish quvvati — eng muhim masala. Usiz mahalliylashtirish, mahsulot turlarini ko‘paytirish va tannarxini pasaytirishga erishib bo‘lmaydi. Bu korxonalarni ishga tushirsak, texnikalarimiz raqobatbardosh bo‘ladi, fermerlarimizga hamyonbop mahsulotlar yetkazib beriladi», — dedi Shavkat Mirziyoyev.
Umumiy qiymati 24 million dollar bo‘lgan yana 4 ta loyiha transmissiya vallari, g‘ildirak disklari, kabinalar va mahkamlovchi temir buyumlar ishlab chiqarishni o‘zlashtirishga qaratilgan.
Ushbu loyihalarni ishga tushirish natijasida sohada mahalliylashtirish darajasi 60 foizga yetkaziladi, mahsulot tannarxi 32 foizga va import yiliga 116 million dollarga kamayadi. Shuningdek, bu yangi quvvatlar nafaqat «O‘zagrotexsanoatxolding» korxonalari, balki «O‘zavtosanoat» tizimida ishlab chiqarilayotgan avtomobillar, yuk transportlari va avtobuslar uchun ham butlovchi qismlarni kooperatsiya asosida yetkazib berishni ta’minlaydi.
Davlat rahbari mutasaddilarga mazkur loyihalarni amalga oshirishni jadallashtirib, kelgusi yil ishga tushirish zarurligini qayd etdi.
Shavkat Mirziyoyev traktor yig‘ish va payvandlash sexlari, «O‘zKlaasAgro» O‘zbekiston-Germaniya qo‘shma korxonasidagi ishlab chiqarish jarayonini ko‘zdan kechirdi. Ularda lokalizatsiya darajasini oshirish, yangi qismlar va mahsulotlar ishlab chiqarishni o‘zlashtirish bo‘yicha ko‘rsatmalar berdi.
Prezident shu kuni zavodda agrar soha mashinasozligini rivojlantirish bo‘yicha yig‘ilish o‘tkazdi.
Yig‘ilishda qishloq xo‘jaligi texnikasi ishlab chiqarishni rivojlantirish, mahsulot va xizmatlar turlarini kengaytirish masalalari muhokama qilindi. Joriy yil 1 oktyabrdan boshlab iqtisodiyotning barcha jabhalari qatori ushbu sohada ham soliq imtiyozlari bekor qilinayotgani tarmoq korxonalaridan yanada faol ishlashni talab qilishi qayd etildi.
Avvalo bozorbop texnikalar ishlab chiqarish, tannarxni kamaytirish, mahalliylashtirishni chuqurlashtirish korxonalar oldidagi eng muhim vazifalar bo‘lishi kerakligi ta’kidlandi.
Kabina, boshqaruv tizimi, g‘ildirak, tezlik uzatgich, osma tizimlar kabi asosiy qismlar lokalizatsiya darajasini 32 foizdan 56 foizga yetkazib, tannarxni 30 foizgacha arzonlashtirish, shuningdek, mahalliy korxonalar o‘rtasida kooperatsiyani yo‘lga qo‘yish orqali yillik importni 20 million dollarga qisqartirish mumkinligi ko‘rsatib o‘tildi.
Fermerlarni qishloq xo‘jaligi texnikasi bilan ta’minlashning barqaror moliyaviy mexanizmlarini yaratish, texnikalarga servis va ta’mirlash xizmati ko‘rsatish, ehtiyot qismlar yetkazib berishni yaxshilash bo‘yicha topshiriqlar berildi.
Qishloq xo‘jaligi texnikasini sertifikatlash tizimini takomillashtirish, tayyor mahsulotlar bilan birga xizmatlar eksportini ham kengaytirish vazifasi qo‘yildi. Zamonaviy texnikalar ishlab chiqaruvchi va ularga xizmat ko‘rsatuvchi malakali mutaxassislar tayyorlash masalasiga ham alohida e’tibor qaratildi.
«Bizga raqobatbardosh texnika kerak, qo‘shimcha qiymat zarur. Tizim korxonalarida minglab odamlar ishlashi lozim. Bugun belgilangan maqsadlarni kim amalga oshiradi? Mutaxassis. Nima amalga oshiradi? Aql, bilim, mehnat amalga oshiradi», — dedi prezident.
Qayd etilganidek, 2018 yilda fermerlarga 11,5 ming dona texnika yetkazib berilgan. O‘tgan yili 10 million dollar, joriy yilning birinchi yarmida esa 15 million dollarlik qishloq xo‘jaligi texnikasi eksport qilingan. Lekin bu mavjud salohiyat va talabga nisbatan juda kam. Bugungi kunda qishloq xo‘jaligida yiliga 11 mingdan ziyod texnikaga, jumladan, 4 mingta traktor, 500 ta kombayn va 5 mingdan ziyod osma-tirkama texnikaga ehtiyoj mavjud. Bundan tashqari, 2022 yilgacha 263 ming gektar, 2025 yilgacha yana 1 million gektardan ziyod yerlar qayta foydalanishga kiritilishi bois bu ehtiyoj yanada oshadi.
Hozirda mavjud texnikalarning 46 foizi ko‘p muddatdan buyon foydalanishda bo‘lib, yaroqsiz ahvolga kelib qolgan. Fermerlardagi texnikalarning 97 foizi paxta va g‘alla uchun mo‘ljallangan.
