Joriy yilning aprel — may oylarida Xalq ta’limi vazirligining buyrug‘iga ko‘ra, Kundalik raqamli ta’lim platformasi poytaxtdagi 53 ta umumta’lim maktabida sinovdan o‘tkazildi. Bu haqda XTV matbuot xizmati xabar berdi.
Kundalik tizimi onlayn rejimda dars jadvallari, o‘qituvchilar dars rejalari, o‘quvchilarning darsdagi ishtiroki hamda o‘zlashtirishini elektron jurnal va kundaliklarga kiritib borish imkonini beradi. Shuningdek, ta’lim muassasasining statistik hisobotlarini ishlab chiqishni ham ta’minlaydi.
Loyihaning birinchi bosqichida qatnashgan maktablar sinf jurnallarini bir vaqtning o‘zida qog‘oz hamda Kundalik tizimida elektron shaklda yuritishdi.
Mazkur tizim orqali o‘quvchilar va ularning ota-onalari uy vazifalari hamda fanlardan qo‘yilgan baholar haqida istalgan vaqtda ma’lumot olish imkoniga ega bo‘lishadi. Ushbu ma’lumotlar himoyalangan ijtimoiy tarmoqlar orqali taqdim etiladi.
O‘zbekiston Respublikasi xalq ta’limi vazirligining Avtomatlashtirilgan axborot tizimini joriy etish bo‘yicha mas’ul vakillari Arslon Rahmonqulov hamda Rustam Komilovning ta’kidlashicha, 2019 yilning 1 sentyabrigacha Toshkent shahridagi barcha umumta’lim maktabida elektron jurnal va kundaliklarni ta’lim tizimiga joriy etish bo‘yicha tashkiliy ishlar amalga oshiriladi. Yangi o‘quv yilidan boshlab Kundalik tizimi poytaxtdagi barcha maktabda ish boshlaydi.
Shuningdek, Kundalik tizimini o‘quv jarayoniga tatbiq qilish uchun o‘qituvchilarni tayyorlashga ham katta e’tibor qaratilmoqda. Kundalik kompaniyasi tizimni sohaga joriy etishda o‘qituvchilar hamda maktab rahbarlariga amaliy yordam beradi.
Bundan tashqari, tizimni hayotga tatbiq qilishda yuzaga kelishi ehtimoli bo‘lgan savollarga o‘z vaqtida javob topish maqsadida loyihada qatnashayotgan maktab vakillari ishtirokida har haftada anjumanlar uyushtirib boriladi.
Eslatib o‘tamiz, 2018 yilning oktyabr oyida Xalq ta’limi vazirligi hamda Kundalik kompaniyasi o‘zaro hamkorlikda umumta’lim maktablarida elektron jurnal va kundaliklarni yuritishni ko‘zda tutuvchi loyihani yo‘lga qo‘ygan.
Kompaniyaning mazkur tashabbusi xalq ta’limi sohasini axborotlashtirish bo‘yicha takliflarni saralash natijalariga ko‘ra vazirlik tomonidan tanlab olingan va ushbu mutasaddi tashkilot hamda Kundalik kompaniyasi o‘rtasidagi davlat-xususiy sheriklik doirasida hayotga tatbiq qilinmoqda.
Kundalik kompaniyasi mazkur loyihani hayotga tatbiq etish, qo‘llab-quvvatlash va tizimni ravnaq toptirish jarayonida yuzaga keladigan barcha xarajatni o‘z zimmasiga olgan.
158-maktabning rus tili va adabiyot fani o‘qituvchisi, «Do‘stlik» ordeni sohibasi, xalq ta’limi a’lochisi Tatyana Istaxarovaning ta’kidlashicha, Kundalik — zamonaviylik va dolzarblikdir. Aynan shuning uchun ham u darhol ota-onalar va o‘quvchilar e’tiborini tortib, ularning diqqatini jiddiy hamda uzoq muddatli loyihaga qarata oldi.
Ko‘p yillar davomida yetakchilarni tarbiyalab odatlangan muallima zamondan va zamondoshlaridan ortda qolishni istamaydi hamda o‘quvchilarini ham hamisha shunga o‘rgatadi. Bu gal ham shunday bo‘ldi: ota-onalar va o‘quvchilar uni uzoq kuttirishmadi, 7-sinf birinchilardan bo‘lib tizimni faollashtirdi. To‘g‘ri, avval ayrim qiyinchiliklar bo‘ldi, ammo barcha savollarning yechimi jamoaning o‘zidayoq topildi. Tatyana Istaxarovaning aytishicha, Kundalik funksiyalarini tezroq tushunib yetish uchun u hatto kompyuter dasturlari bilan qiziqadigan 8-sinf o‘quvchilaridan maslahat olishga ham uyalmagan.
Tatyana Borisovna dasturdan planshet yordamida foydalanishni juda ham tez o‘zlashtirib olgani va o‘quvchilarni darsning o‘zidayoq baholayotganini, bu esa ularning ijodiy faolligiga yanada ijobiy ta’sir ko‘rsatayotganini ham aytib o‘tdi.
Elektron kundalik sinf rahbarlariga ham katta yordam bermoqda. Hozir uning atrofida bir guruh yordamchilari, guruh administratorlari to‘planishgan. Ular sinfning maktab doirasidagi kundalik reytingini muntazam kuzatib borishadi.
Uning qayd etishicha, ota-onalar bilan har kuni suhbatlashish imkoniyati o‘qituvchini ortiqcha tashvishlardan xalos etib, vaqtni tejash, muammoli vaziyatlarning oldini olishda ham qo‘l kelmoqda. Chunki dastur yordamida har qanday axborot darhol o‘qituvchi va ota-ona o‘rtasida muhokama qilinyapti. «Maktabimiz zamon bilan hamqadam ekanidan xursandman», — deydi Tatyana Borisovna.
Ta’kidlash joizki, o‘quvchilar ham o‘z qiziqishlari doirasida turli guruhlar tuzib, Kundalik tizimida faol ishlashmoqda. Masalan, ular ingliz tilini o‘rganish guruhlarini tashkil qilishgan. Bu orqali esa izlanuvchan o‘quvchilar o‘z tengdoshlarining yangi bilimlarni oson o‘zlashtirishlariga ham ko‘maklashmoqda.
