Surxondaryo viloyatiga safar qilgan O‘zbekiston Respublikasi prezidenti Shavkat Mirziyoyev Muzrabot tumanidagi «Yangiobod invest servis» xususiy korxonasi faoliyati bilan tanishdi. Bu haqda prezident matbuot xizmati xabar berdi.

Yaqinda Muzrabot tumanida parranda go‘shti va tuxum yetishtirishga ixtisoslashgan kompleks ishga tushirildi. 10 gektar maydonda yettita tovuqxona, ikkita jo‘jaxona va ma’muriy binolar qurilib, 220 gektar yer ozuqa yetishtirish yo‘lga qo‘yildi. Natijada 500 ming bosh tovuq boqish, 1 million 735 ming dona jo‘ja parvarishlash imkoniyati yaratildi. 150 kishi ish bilan ta’minlandi. Shu kunlarda 1000 tonna sig‘imga ega muzlatkich omborxona foydalanishga topshiriladi.

Kelgusida tovuq go‘shtidan sosiska, par yostiq va ko‘rpalar, ozuqa mahsulotlari ishlab chiqarish rejalashtirilgan.

Shavkat Mirziyoyev korxona faoliyatini kengaytirish, viloyatning boshqa tumanlarida ham shunday majmualar tashkil etish bo‘yicha topshiriqlar berdi.

Korxonada xitoylik mutaxassislar bilan hamkorlikda biogaz va bioo‘g‘it ishlab chiqarish ham rejalashtirilgan. Uning natijasida majmua o‘zini gaz bilan ta’minlash imkoniga ega bo‘lib, 50 ta qo‘shimcha ish o‘rni yaratiladi.

Shu yerda Surxondaryo viloyatida ertapishar mahsulotlar yetishtirish va eksportga chiqarish, aholi tomorqalaridan samarali foydalanish va qishloq xo‘jaligiga oid boshqa loyihalar taqdimoti ham o‘tkazildi.

Prezident tomorqachilik bo‘yicha olib borilayotgan ishlarga alohida e’tibor qaratdi.

Surxondaryo viloyatida 400 mingta xonadonda 48 ming gektar yer bor. Joriy yilda birinchi ekinlardan 644 ming tonna hosil olindi. Viloyat iqlim sharoitida, kichik issiqxonalar tashkil etish orqali bemalol uch marta hosil olish, eksport qilish mumkin. Bu qariyb 150 ming gektar yerdan foydalanish bilan barobar.

Masalan, bu yil mamlakatimiz tarixida birinchi marta kartoshka eksport qilish yo‘lga qo‘yildi. Surxondaryo viloyatida 270 ming tonnadan ziyod kartoshka yetishtirildi. Uning 100 ming tonnasini eksport qilish rejalashtirilgan.

— Tomorqachilik oziq-ovqat mahsulotlarini arzon qilish, inflyatsiya darajasini pasaytirishda tayanch nuqtalardan biri. Bu orqali qancha odam ishli bo‘ladi, oilalarga daromad, baraka kiradi. Tomorqadan samarali foydalangan odam boqimanda bo‘lmaydi, boy bo‘ladi. Buning uchun tizim yaratilgan, — dedi Shavkat Mirziyoyev.

Shavkat Mirziyoyev «O‘zbekiston temir yo‘llari» AJ tomonidan taqdim etilgan, joylarga borib, arpa, bug‘doy, suli va makajo‘xori donidan yem ishlab chiqaradigan mobil zavodni ham ko‘zdan kechirdi.