31 mart kuni O‘zbekiston prezidenti huzuridagi Xavfsizlik kengashi kotibi Viktor Maxmudov va tashqi ishlar vaziri Abdulaziz Kamilov boshchiligidagi hukumat delegatsiyasi amaliy tashrif bilan Afg‘onistonda bo‘ldi, deya xabar qildi O‘zbekiston Tashqi ishlar vazirligi matbuot xizmati.
O‘zbekiston delegatsiyasi Afg‘oniston prezidenti Muhammad Ashraf G‘ani tomonidan qabul qilindi. Bo‘lib o‘tgan suhbat chog‘ida siyosiy, savdo-iqtisodiy, transport-kommunikatsiya, madaniy-gumanitar va boshqa sohalardagi ikki tomonlama munosabatlarni yanada rivojlantirishning dolzarb masalalari muhokama qilindi.
Afg‘onistondagi holat yuzasidan ham fikr almashildi. Afg‘oniston prezidenti tinchlik jarayonini boshlash borasidagi faol ko‘magi uchun O‘zbekiston tomoniga minnatdorchilik izhor etdi. Mamlakatning ijtimoiy-iqtisodiy qayta tiklanishi mavjud holat barqarorlashuvining muhim sharti hisoblanishini va bu jarayonga O‘zbekiston salmoqli hissa qo‘shayotganini ta’kidladi.
Muhammad Ashraf G‘ani iqtisodiy va infratuzilmaviy hamkorlikni faollashtirganligi uchun Afg‘onistonning O‘zbekistondan minnatdorligini bildirdi. U iqtisodiy hamkorlik mintaqaviy barqarorlikka zamin yaratishini ham ta’kidladi.
Afg‘oniston rahbari, shuningdek, tinchlik muzokaralarini tashkillashtirish maydoni sifatida Samarqand shahrini tanlagani uchun O‘zbekiston delegatsiyasiga minnatdochilik bildirdi.
Afg‘oniston prezidenti matbuot xizmati ma’lumotlariga ko‘ra, O‘zbekiston delegatsiyasi Samarqandda afg‘on hukumati va «Tolibon» harakati o‘rtasida to‘g‘ridan-to‘g‘ri muzokaralar o‘tkazishni taklif qilgan.
Afg‘oniston tashqi ishlar vaziri Salohuddin Rabboniy yakshanba kuni Abdulaziz Kamilov bilan uchrashuvda yaralangan afg‘on askarlariga tibbiy yordam ko‘rsatish bo‘yicha O‘zbekiston bilan to‘liq yordam to‘g‘risidagi iltimos bilan murojaat qildi, deya xabar qildi Afg‘oniston TIV matbuot xizmati.
31 mart kuni O‘zbekiston delegatsiyasining Kobul shahriga tashrifi doirasida O‘zbekiston prezidenti huzuridagi Xavfsizlik kengashi kotibi Viktor Maxmudov va Afg‘oniston prezidentining milliy xavfsizlik masalalari bo‘yicha maslahatchisi Hamidulla Muhib raisligida Xavfsizlik masalalari bo‘yicha qo‘shma komissiyaning navbatdagi yig‘ilishi bo‘lib o‘tdi.
Shu kunning o‘zida O‘zbekiston delegatsiyasi Afg‘oniston hukumati Ijroiya kengashi raisi Abdulla Abdulla, prezidentning milliy xavfsizlik masalalari bo‘yicha maslahatchisi Hamidulla Muhib, BMT bosh kotibining maxsus vakili, BMTning Afg‘onistonga yordam missiyasi (UNAMA) rahbari Tadamichi Yamamoto va sobiq prezident Hamid Karzay bilan muzokaralar o‘tkazdi.
O‘zbekiston va Afg‘oniston iqtisodiy bloki vazirlik va idoralari rahbar va vakillarining alohida uchrashuvlari o‘tkazilib, ularda hamkorlik hajmlarini yanada oshirish, o‘zaro savdoga yangicha shiddat berish, yirik qo‘shma investitsiya loyihalarini amalga oshirish, Mozori-Sharif-Hirot va Mozori-Sharif-Kobul-Peshovor temir yo‘l magistrallarini, Surxon-Puli-Xumri elektr uzatish liniyasini barpo etish bo‘yicha takliflarning amaliy jihatlari ko‘rib chiqildi.
