Davlat test markazi tomonidan oliy ta’lim muassasalariga test sinovlari orqali qabul qilish tizimini takomillashtirishga oid prezident qarori loyihasi jamoatchilik muhokamasiga qo‘yildi. Bu haqda Adliya vazirligi Telegram-kanalida xabar qildi.
Loyihada, shu jumladan, oldingi o‘quv yillarida ta’lim muassasalarini tugatgan abituriyentlardan (to‘liq davlat ta’minotidagi yetim bolalar, I va II guruh nogironlari mustasno) test sinovlarida ishtirok etishi uchun eng kam ish haqining bir barobariga teng miqdorida yig‘im (202 730 so‘m) undirish taklif etilmoqda.
«Ushbu yig‘imlar Davlat test markazi faoliyatini rivojlantirish jamg‘armasiga yo‘naltiriladi. Joriy yil bitiruvchilari uchun test sinovlari bepul asosda o‘tkaziladi», — deyiladi loyihada.
Qaror loyihasi muhokamasi 2 martga qadar quyidagi manzilda davom etadi.
