Toshkentning 11 tumanida 4-yanvardan xorijga chiqish pasportlarini rasmiylashtirish uchun hujjatlarni qabul qilish boshlandi, deya xabar qildi poytaxt Migratsiya va fuqarolikni rasmiylashtirish boshqarmasi boshlig‘i podpolkovnik Qudrat Yuldashev.
“1−3-yanvar kunlari zarur uskunalarni o‘rnatdik, fuqarolar uchun sharoitlar yaratdik va xodimlarni o‘qitdik. Bugun birinchi kun. Avvaliga punktlardagi har bir biometrik ma’lumotlarni to‘plash uskunasi orqali kuniga 180−200 kishini o‘tkazish qobiliyatiga ega bo‘lishini kutgan edik. Biroq so‘nggi ma’lumotlarga ko‘ra, biz 200 dan ko‘proq kishini qabul qila olishimizni ko‘rsatdi”, — dedi u.
O‘zbekiston IIV Migratsiya va fuqarolikni rasmiylashtirish bosh boshqarmasi boshlig‘i Badriddin Shorixsiyevning “Gazeta.uz"ga xabar berishicha, bugungi kunda beshta viloyatda uskunalarni o‘rnatish ishlari hali yakuniga yetkazilgani yo‘q. Ularning 7-yanvardan arizachilarni qabul qilishni boshlashi kutilmoqda.
Avval xabar qilganimizdek, xorijga chiqish pasporti Vazirlar Mahkamasi huzuridagi Davlat personallashtirish markazi tomonidan 10 ish kuni ichida rasmiylashtirilishi lozim. Kattalar uchun hujjatning amal qilish muddati — 10 yil (bolalar uchun — kamroq).
Ikki yil muddatga beriluvchi xorijga chiqish uchun ruxsatnoma stikeri (ovir) bekor qilindi. Pasportda ovir mavjud bo‘lsa, uning amal qilish muddati tugagunga qadar xorijga chiqish mumkin.
Xorijga chiqish pasportini olish uchun ish, o‘qish joyi yoki o‘zini o‘zi boshqarish organidan tasdiqlangan ikki nusxadagi ariza, unga qo‘shimcha ravishda 3,5 sm x 4,5 sm hajmdagi bir dona fotosurat, pasport nusxasi va harbiy hududiy Mudofaa ishlar bo‘limi ma’lumotnomasi (agar harbiy xizmatga majbur bo‘lsa) taqdim etish lozim.
Xorijga chiqish pasporti uchun eng kam ish haqining 120 foizi miqdorida (243276 so‘m) davlat boji undiriladi.
