Hukumatning 14 dekabrdagi qarori bilan Yengil avtomobillar va mototransport vositalarini qisqa muddatli ijaraga berish tartibi to‘g‘risidagi nizom tasdiqlandi, deya xabar qildi Adliya vazirligi Telegram-kanali.

Mazkur Nizomga ko‘ra yengil avtomobillar va mototransport vositalarini qisqa muddatli ijaraga berish shartnomasi 30 kundan ortiq bo‘lmagan muddatga yozma tarzda tuziladi.

Qisqa muddatli ijara shartnomasini notarial rasmiylashtirish hamda DYHXX organlaridan ro‘yxatdan o‘tkazish talab etilmaydi.

Qisqa muddatli ijara shartnomasida taraflar, ya’ni ijaraga beruvchi yuridik shaxs, ijaraga oluvchi (ijarachi) esa jismoniy shaxs bo‘ladi.

Shartnoma tuzish uchun ijaraga oluvchi ijaraga beruvchiga quyidagi hujjatlarni taqdim etadi:

pasport;

haydovchilik guvohnomasi;

tibbiy ko‘rikdan o‘tganlik haqida ma’lumotnoma;

garov depoziti kiritilganligini tasdiqlovchi hujjat.

Qisqa muddatli ijara shartnomasining muddati tugagandan so‘ng transport vositasi ijaraga beruvchi tomonidan topshirish va qabul qilish dalolatnoma asosida qabul qilib olinadi.

Qisqa muddatga ijaraga beriluvchi transport vositalari texnik soz, videoregistrator va GPS-navigatorlar bilan ta’minlanishi, YHQ va xavfsizligi talablariga mos ravishda jihozlangan hamda texnik ko‘rikdan o‘tkazilgan bo‘lishi lozim.

Ijaraga oluvchi shaxs transport vositasini faqatgina to‘ridan-to‘g‘ri maqsadi bo‘yicha foydalanishi, uchinchi shaxslarga bermasligi lozim.

Transport vositalariga shikast yetkazilgan yoki yo‘l-transport hodisasiga uchragan taqdirda, ijarachi zudlik bilan ijaraga beruvchiga ma’lumot berishi lozim.