Avval xabar berganimizdek, Xalq ta’limi vazirligi tomonidan uyushtirilgan matbuot anjumanida qilingan ishlar va istiqboldagi rejalar haqida ma’lumot berildi.

Anjumanda ta’kidlanganidek, Xalq ta’limi vazirligi soha faoliyati shaffofligini oshirish, aniq ma’lumotlarni to‘plash, aholi bilan muloqot qilish va jamoatchilik nazoratini o‘rnatish uchun axborot texnologiyalarini faoli joriy etmoqda. Jumladan, vazirlik ustozovozi.uzedu.uz, stat.uzedu.uz, eduportal.uz kabi resurslarni ishga tushirdi. Xalq ta’limi tizimiga homiylik mablag‘larini jalb etish maqsadida MFond jamg‘armasi ochildi. Xalq ta’limi sohasidagi ma’lumotlar ochiq-oshkora, shaffof tarzda qo‘yib borish uchun ijtimoiy tarmoqlari kanallarida «Ustoz ovozi» kanali ishga tushirildi.

Xalq ta’limi vazirligi tizimida o‘quvchilar o‘rtasida kitob mutolaasi va kitobxonlik madaniyatini targ‘ib qilish uchun kitob.uz sayti yaratilgan. Saytga jami 803 nomdagi, shundan, 655 nomada o‘zbek va 148 nomda jahon bolalar adabiyoti namoyondalari asarlarining elektron varianti joylashtirilgan. www.kitob.uz saytiga badiiy adabiyotlarning MRZ shaklidagi audio resurslari joylashtirilmoqda. Saytga o‘quvchilar mutolaasi uchun tavsiya qilingan 125 nomdagi adabiyotlar ro‘yxati joylashtirilgan.

Vazirlik markaziy apparati tarkibida o‘qituvchilarning sha’ni va qadr-qimmatini himoyalash, ular huquqlarining buzilishiga yo‘l qo‘ymaslik, davlat organlari va boshqa tashkilotlarning ta’lim muassasalari faoliyatiga asossiz aralashuviga yo‘l qo‘ymaslik maqsadida Nazorat-huquqiy xizmati tashkil etildi.

Respublika maqsadli kitob jamg‘armasi Moliya vazirligidan Xalq ta’limi vazirligiga o‘tkazildi. Xalq ta’limi sohasida loyiha hujjatlariga texnik topshiriqlarni ishlab chiqish va qurilish ob’ektlari sifatini nazorat qilish injiniring kompaniyasi tashkil etildi.

Xalq ta’limi sohasidagi islohotlarga ko‘maklashish jamg‘armasi tashkil etildi, shu bilan birga 2019 yil 1 yanvardan xalq ta’limini rivojlantirish jamg‘armasi tashkil etiladi.

2018 yil davomida Xalq ta’lim vazirligi ilg‘or xorijiy tajribalarni o‘rganish uchun rivojlangan mamlakatlar hamda ularning davlat va xususiy tashkilotlari bilan uchrashuvlar va muzokaralar o‘tkazildi. Ular orasida Finlyandiya, Xitoy, Buyuk Britaniya, Germaniya, AQSH kabi mamlakatlari vakillari bor. Vazirlik vakillari Janubiy Koreya va AQSH tashrif buyurdilar va mahalliy tashkilotlar bilan hamkorlik aloqalarini o‘rnatdilar.

2018 yil davomida xalq ta’lim sohasida katta ko‘lamdagi ishlar amalga oshirilgan bo‘lsa ham, sohada amalga oshirilishi lozim ishlar ko‘p. Hozirda ishlar asosan muammolarni aniqlash va ularga yechim topish ustida ish olib borilgan bo‘lma, keyingi bir necha yil ta’lim sifatini, o‘quv dasturlarini va darsliklarni takomillashtirishga yo‘naltiradi.

2019 yildagi ustuvor vazifalar:

1. Umumiy o‘rta ta’limning o‘quvchilarni mustaqil fikrlashga undaydigan Davlat ta’lim standartlari o‘quv dasturlari va o‘quv rejalari qaytadan ko‘rib chiqilib, takomillashtiriladi.

2. Har bir hududda (birinchisi 2019 yilda Qoraqalpog‘istonda) iqtidorli o‘quvchilar uchun «Prezident maktablari» tashkil etiladi.

3. 2019 yildan boshlab, barcha sharoitlarga ega bo‘lgan «Zamonaviy maktab"barpo etiladi.

4. Jamiyatda o‘qituvchilarning nufuzini yanada oshirish maqsadida «O‘qituvchi maqomi to‘g‘risida» O‘zbekiston Respublikasi Qonuni ishlab chiqiladi.

5. Ta’lim sifati yuqori bo‘lgan namunali maktablar tarmog‘i («setevaya shkola») kengaytiriladi.

6. Davlat xususiy sherikchilik asosida nodavlat ta’lim muassasalari 2 baravarga ortadi.