Sport turlarini rivojlantirish, saralash ishlarini takomillashtirish, sohaga yangi zamonaviy metodlarni joriy etish maqsadida 2018 yil 18 oktyabrda Jismoniy tarbiya va sport vazirining «Sport turlari bo‘yicha Respublika oliy sport mahorati maktablari faoliyatini tubdan takomillashtirish to‘g‘risida"gi buyrug‘i qabul qilindi. Bu haqda Jismoniy tarbiya va sport vazirligi matbuot xizmati xabar berdi.
Mazkur buyruq asosida Respublika oliy sport mahorati maktablari (ROSMM) huzuridagi Trenerlar kengashi to‘g‘risidagi nizom tasdiqlanib, kengash faoliyati yangicha ko‘rinishda yo‘lga qo‘yildi, vakolatlari kengaytirildi.
Jumladan, sport ta’limi muassasalarining katta trener va yo‘riqchi-uslubchi lavozimiga nomzodlar ROSMMlar huzuridagi Trenerlar kengashi bilan kelishilgan holda saralanadi. Bu quyi tizimdagi sport ta’limi muassasalaridagi iqtidorli sportchilarni aniqlash va tajribali murabbiylar orqali ularning qobiliyatini yanada oshirish imkonini beradi.
Buyruqda shuningdek, musobaqalarga sportchilarni yuborish va sport tadbirlarini tashkil etishda trenerlar kengashi xulosasi talab qilinishi belgilab qo‘yildi. Hududlarda o‘tkazilayotgan musobaqa mazmuni va samaradorligini boyitish maqsadida Jismoniy tarbiya va sport vazirligining hududiy bo‘linmalari 2019 yildan boshlab barcha turdagi ommaviy jismoniy tarbiya va sport tadbirlarining yagona kalendar rejasini tegishli sport turlari bo‘yicha ROSMMlar bilan kelishgan holda belgilaydi.
Hujjatdagi yana bir muhim jihat — sportchilarni saralash (seleksiya) ishlarini samarali yo‘lga qo‘yish maqsadida ROSMMlar shtat jadvaliga davlat trener-seleksioner va sport-menejeri lavozimlari kiritildi.
Ushbu buyruq asosida ROSMM hamda boshqa sport ta’lim muassasalari, federatsiya (uyushmalar)lar sport turlarini rivojlantirish bo‘yicha hamkorlikni ta’minlash sxemasi tasdiqlandi. Mazkur sxema orqali o‘zaro hamkorlikni rivojlantirishning yagona tizimi yaratildi.
Shu kungacha Respublika oliy sport mahorati maktablari (ROSMM), ixtisoslashtirilgan olimpiya zaxiralari maktab-internatlari, sport turlari bo‘yicha ixtisoslashtirilgan bolalar-o‘smirlar sport maktablari, bolalar-o‘smirlar sport maktablari hamda boshqa sport ta’lim muassasalari va nodavlat tashkilotlari o‘rtasida sohani rivojlantirish bo‘yicha o‘zaro hamkorlikning yo‘qligi, aniq mexanizmning yaratilmagani seleksiya ishlarini samarali yo‘lga qo‘yishga to‘sqinlik qilgan. Oqibatda, chekka-chekka hududlardagi iqtidorli yoshlar e’tiborsiz qolib ketavergan.
Ma’lumot uchun: Bugungi kunda Jismoniy tarbiya va sport vazirligi tizimida sport yakkakurashlari, sport o‘yinlari, sportning qishki va murakkab texnik turlari, gimnastika, suv sporti, yengil atletika, ot sport turlari turlari bo‘yicha jami 7 ta Respublika oliy sport mahorati maktabi faoliyat ko‘rsatmoqda.
