Farg‘ona politexnika instituti bugungi kunda o‘ndan ortiq davlatlarning oliy o‘quv yurtlari bilan hamkorlikni yo‘lga qo‘ydi. Bu haqda institut matbuot xizmati xabar berdi, deyiladi O‘zA saytidagi axborotda.
Mamlakatimizda oliy ta’lim muassasalari pedagog kadrlarining kasb mahoratini yanada oshirish, ta’lim dasturlarini takomillashtirish, bu borada xalqaro hamkorlikni yanada mustahkamlash borasida keng ko‘lamli ishlar amalga oshirilmoqda. Farg‘ona viloyatidagi oliy o‘quv yurtlari ham Rossiya, Germaniya, AQSH kabi davlatlarning oliy o‘quv dargohlari bilan xalqaro ta’lim dasturlari bo‘yicha hamkorlik qilib kelmoqda.
Farg‘ona politexnika institutida Vladimir Shuxov nomidagi Belgorod davlat texnologiya universiteti bilan hamkorlikda texnologik jihozlar va komplekslar qo‘shma fakulteti ochildi. Fakultetni tashkil etishdan maqsad o‘quv-uslubiy, ilmiy-tadqiqot va boshqa sohalardagi o‘zaro manfaatli integratsion aloqalarni takomillashtirish asosida yuqori malakali mutaxassislarni tayyorlashdir.
Shuningdek, politexnika instituti Qirg‘izistonning Musa Adishev nomidagi O‘sh texnologiya universiteti, Belarus davlat texnologiya universiteti va akademik Muhammad Osimiy nomidagi Tojikiston texnika universiteti bilan talabalarni o‘qitish va ikki tomonlama tan olinadigan diplom berish amaliyotini joriy etish bo‘yicha shartnoma tuzgan.
2018−2019 o‘quv yilida o‘quv jarayoniga 32 nafar xorijiy professor-o‘qituvchilar, olimlar va mutaxassislarni tashrif jadvali shakllantirildi. V.G.Shuxov nomidagi Belgorod davlat texnologiya universiteti, Ufa davlat neft-texnika universiteti, Voronej davlat texnika universiteti, Novosibirsk davlat universiteti hamda Sankt-Peterburg fizika-texnika institutidan professorlar kelib, talaba va magistrlarga, ilmiy tadqiqotchilarga fizika, matematika, kimyo hamda texnika fanlarining zamonaviy yutuqlari haqida ma’ruza qildi.
