O‘zbekiston Davlat xavfsizlik xizmati Chegara qo‘shinlari «Ozodlik» radiosi saytining Qirg‘iziston bilan chegarada navbatlar hosil bo‘layotgani haqidagi xabarni rad etdi. Bu haqda Chegara qo‘shinlari vakili «Gazeta.uz"ga xabar qildi.
Foto: «Ozodlik» radiosi.
Xabarda qayd etilishicha, O‘zbekistonning Farg‘ona viloyatini Qirg‘izistonning Botken viloyati bilan bog‘lab turuvchi «Vodil» o‘tkazish punktini kesib o‘tish 11 soat vaqt olmoqda.
DXX Chegara qo‘shinlari vakili mazkur punkt to‘xtalishlarsiz ishlayotgani (o‘tkazish qobiliyati sutkasiga 8000 kishidan ortiq bo‘lib, kuniga 6000−6500 kishi kesib o‘tmoqda) va navbatlar kuzatilmayotganini ma’lum qildi. Kontrollerlar ish o‘rni 8 dan 12 kishiga oshirilgan bo‘lib, ayni vaqtda O‘zbekiston-Qirg‘iziston chegaralarini kesib o‘tish 10−15 daqiqani olmoqda, deya ta’kidladi Chegara qo‘shinlari vakili.
Foto: DXX Chegara qo‘shinlari
««Ozodlik» e’lon qilgan navbat tasvirlangan foto istalgan joyda olingan bo‘lishi mumkin, ammo «Vodil"da emas», — dedi DXX CHQ vakili «Vodil» o‘tkazish punkti fotosuratlarini taqdim etar ekan.
Foto: DXX Chegara qo‘shinlari.
Hozirda ikki davlat o‘tkazish punktlarida qurilish ishlari olib borilmoqda. Bundan ko‘zlangan maqsad — O‘zbekiston va Qirg‘iziston fuqarolarining chegaralarni qulay kesib o‘tishlari uchun sharoitlarni yaratishdan iborat. Ushbu ishlar ham har ikki tomondan o‘tkazish punktlari o‘tkazuvchanlik qobiliyatiga ta’sir ko‘rsatmaydi, dedi Chegara qo‘shinlari vakili.
