7 avgust kuni O‘zbekiston Respublikasi Ichki ishlar vaziri general-mayor Po‘lat Bobojonov raisligida Vazirlik Hay’atining videoselektor tarzidagi navbatdan tashqari majlisi bo‘lib o‘tdi. Bu haqda IIV Jamoatchilik va OAV bilan aloqalar boshqarmasi xabar berdi.
Unda O‘zbekiston Respublikasi Prezidenti devoni mas’ul xodimlari, Bosh prokuror, 3-darajali davlat adliya maslahatchisi Otabek Murodov, shuningdek, Bosh prokuratura va Ichki ishlar vazirligining rahbar xodimlari, hududlardagi prokurorlar va ichki ishlar organlari boshliqlari ishtirok etdilar.
Unda O‘zbekiston prezidenti rahbarligida 2018 yil 27 iyul kuni huquqbuzarliklar profilaktikasi va jinoyatchilikka qarshi kurashish masalalari yuzasidan o‘tkazilgan kengaytirilgan videoselektor yig‘ilishida belgilab berilgan topshiriqlarni bajarilishiga alohida e’tibor qaratildi.
Joriy yilning olti oyi davomida ichki ishlar organlari faoliyati samaradorligini oshirish, xalqimizning tinch va osoyishta hayot kechirishini ta’minlash, jinoyatchilikning o‘sishiga yo‘l qo‘ymaslik choralari ko‘rilishi natijasida o‘tgan yilning shu davriga nisbatan respublika bo‘yicha jinoyat sodir etish holatlari 13 ming 599 taga yoki 38,67 foizga, jinoyat qidiruv yo‘nalishidagi jinoyatlar esa 8 ming 568 taga yoki 38,86 foizga kamaygan.
Yig‘ilishda prezident raisligida 27 iyul kuni o‘tkazilgan majlisda ko‘tarilgan muhim masalalar, shu jumladan «Jinoyatga qarshi kurashish haqiqati va adolati» tizimini amaliyotga keng joriy etish masalasiga alohida to‘xtalib, sodir etilishi mumkin bo‘lgan huquqbuzarliklarning barvaqt oldini olish, jinoyatlarni fosh etish va jazo muqarrarligini ta’minlashda qonuniylik, adolatlilik va tezkorlik prinsiplari ustuvorligini so‘zsiz ta’minlash, ortida inson taqdiri bo‘lgan har qanday jinoyatga, uning og‘ir-yengilligidan qat’i nazar, katta e’tibor bilan yondashish va uning chin sabablarini aniqlab, bartaraf etish choralari o‘z vaqtida ta’minlanishi lozimligi ta’kidlandi.
Ayrim hududlarda oila-turmush doirasidagi va voyaga yetmaganlar o‘rtasidagi jinoyatlar soni yuqoriligicha qolayotganligi sabablari yuzasidan viloyat ichki ishlar boshqarmalari boshliqlarining axborotlari tinglandi.
Oila-turmush, qarindoshchilik va qo‘ni-qo‘shnichilik munosabatlarida kelib chiqayotgan kelishmovchiliklar qotillik, tan jarohati yetkazish kabi o‘ta og‘ir va og‘ir jinoyatlarni keltirib chiqarish holatlari barcha hududlarda ham kuzatilayotganligini hisobga olib, ularning barvaqt oldini olish va jinoyatni keltirib chiqarishi mumkin bo‘lgan shart-sharoitlarni o‘z vaqtida bartaraf etishga qaratilgan chora-tadbirlar mahalla, xotin-qizlar qo‘mitasi, yoshlar tashkilotlari, mas’ul davlat idoralari va huquqni muhofaza qiluvchi organlar tomonidan yaqin hamkorlikda o‘tkazilmayotganligi, muqaddam sudlanganlar bilan profilaktik ishlar talab darajasida olib borilmayotganligi qayd etildi.
Yo‘l-transport hodisalari, ayniqsa inson o‘limi bilan bog‘liq holatlarning oldini olishga qaratilgan tadbirlarning samarasizligi, yo‘l belgilarini xatlovdan o‘tkazish, ularni zamonaviy qoplamali yo‘l belgilari bilan almashtirish borasidagi ishlarni tashkillashtirishda yo‘l qo‘yilayotgan kamchiliklar bo‘yicha rahbarlarning hisobotlari eshitildi.
Shuningdek, joylarda mulkiy turdagi jinoyatlar, o‘g‘irlik va firibgarliklarning oldini olishda maqsadli va manzilli tadbirlar o‘tkazishga e’tibor berilmayotganligi ta’kidlandi. Yig‘ilishda qo‘riqlash xizmati yo‘nalishida amalga oshirilayotgan ishlar talabga javob bermayotganligi, aholi xonadonlari, tashkilot va korxonalar qo‘riqlovga olinishi yuzasidan targ‘ibot ishlari sust olib borilayotganligi yuzasidan e’tirozlar bildirildi.
Ommaviy axborot vositalarida «Jinoyatga qarshi kurashish haqiqati va adolati» tizimiga bag‘ishlangan maxsus ruknlar va teleradiomateriallar tayyorlashni tashkil etish va aholiga yetkazish orqali jinoyatchilikka qarshi murosasizlik muhitini yanada mustahkamlashga qaratilgan ta’sirchan chora-tadbirlarni amalga oshirish yuzasidan tegishli topshiriqlar berildi.
Majlisda hududlarni jadal ijtimoiy-iqtisodiy rivojlantirish bo‘yicha ichki ishlar organlari rahbarlariga biriktirilgan sektorlarda Prezident va Hukumat hujjatlarida belgilangan vazifalar to‘laqonli bajarilmayotganligi ham tanqidiy muhokama qilindi.
Vazirlik Hay’atida ichki ishlar organlari tizimida kadrlarni tanlash va joy-joyiga qo‘yish masalasi ham alohida ko‘rib chiqildi. Barcha bo‘g‘indagi xodimlarning xizmat faoliyati ustidan kundalik idoraviy nazoratni kuchaytirish, ular tomonidan sodir etilishi mumkin bo‘lgan salbiy holatlarning kelib chiqishiga chek qo‘yish, shaxsiy tarkib orasidagi ma’naviy-ruhiy muhitni sog‘lomlashtirish va tartib-intizomni mustahkamlashga qaratilgan kompleks chora-tadbirlar bo‘yicha qaror qabul qilindi.
Yig‘ilishda faoliyatni samarali tashkil etish, shaxsiy tarkib o‘rtasida qonunchilik va xizmat intizomiga rioya etilishini ta’minlashda yo‘l qo‘yilgan kamchiliklar yuzasidan Ichki ishlar vazirligi va quyi tizim organlari rahbarlarining hisobotlari eshitildi. Joriy yilning o‘tgan davrida xodimlar tomonidan sodir etilgan salbiy holatlar muhokama etilib, ularning kelgusida sodir etilishini oldini olish bo‘yicha aniq chora-tadbirlar belgilash bo‘yicha topshiriqlar berildi.
Shuningdek, Toshkent shahrida joriy etilgan «Xavfsiz poytaxt» konsepsiyasi jinoyatchilikka qarshi kurashish, huquqbuzarliklarning barvaqt oldini olishda samarali mexanizm sifatida o‘zini oqlayotganligi qayd etilib, mazkur konsepsiya doirasidagi chora-tadbirlarni respublikaning boshqa hududlarida ham sifatli tashkil etish bo‘yicha topshiriq berildi.
Yig‘ilishda ishtirok etgan O‘zbekiston Respublikasi Bosh prokurori, 3-darajali davlat adliya maslahatchisi Otabek Murodov o‘z ma’ruzasida ichki ishlar organlari tizimini isloh qilish bo‘yicha qabul qilingan qator qonun, farmon va qarorlar ijrosini ta’minlashda joylarda jiddiy kamchiliklarga yo‘l qo‘yilayotganligini bayon qilib, ularning ayrimlari bo‘yicha bajarilmay qolayotgan tadbirlarni tanqidiy muhokama qildi, ushbu hujjatlarning ijrosi ustidan nazorat bundan buyon yanada kuchaytirilishini, barcha bo‘g‘indagi rahbarlar ijro intizomiga qat’iy rioya etishlari, farmon va qarorlarda belgilangan vazifalarning o‘z vaqtida va sifatli bajarilishini ta’minlashlari zarurligini ta’kidladi.
Bundan tashqari, majlisda shu kunlarda Ichki ishlar vaziri general-mayor Po‘lat Bobojonov rahbarligidagi Ishchi guruhi tomonidan Samarqand, Qashqadaryo va Surxondaryo viloyatlari ichki ishlar organlarining fuqarolar huquqlari, erkinliklari va qonuniy manfaatlari ishonchli himoya qilinishini ta’minlash borasidagi faoliyatini tekshirish davomida aniqlangan kamchiliklar atroflicha muhokama qilindi.
Ushbu tekshiruvlar haqida muqaddam IIV tomonidan batafsil ma’lumot berilgan edi.
Xususan, ishchi guruh tomonidan mazkur viloyatlardagi har bir xodimning sohada amalga oshirilayotgan islohotlarning mohiyatini to‘laqonli anglab yetganligi va ularni hayotga tatbiq etishdagi daxldorlik hissi, fuqarolar bilan belgilangan tartib-taomillar doirasida muloqotda bo‘lishi va faoliyatida yo‘l qo‘yilayotgan kamchiliklarning tub sabablari atroflicha tahlil qilinib, egallab turgan lavozimiga noloyiq, bugungi kun talablariga javob bermaydigan, hanuz eskicha ish uslubida xizmat qilayotgan, o‘z ustida ishlamasdan, fuqarolarning manfaati yo‘lida jonbozlik ko‘rsatmayotgan rahbar va xodimlar intizomiy jazoga tortilganliklari yana bir bor ta’kidlandi.
Hay’atning navbatdan tashqari majlisi kun tartibiga qo‘yilgan keyingi masalalar, xususan «Paxta-2018» mavsumi davrida jamoat tartibini saqlash, yong‘in hamda yo‘l harakati xavfsizligini ta’minlash chora-tadbirlarini ko‘rish hamda O‘zbekiston Respublikasi mustaqilligining yigirma yetti yilligini nishonlash tadbirlariga tayyorgarlik ko‘rish, uni o‘tkazish davrida xavfsizlik choralarini belgilash masalalari ham ko‘rib chiqilib, kelgusida amalga oshirilishi lozim bo‘lgan vazifalar belgilab olindi.
