O‘zbekiston prezidenti Shavkat Mirziyoyev payshanba kuni Navoiy viloyatiga safari chog‘ida mamlakatdagi yirik kimyo korxonasi — «Navoiyazot» AJda amalga oshirilayotgan loyihalar bilan tanishdi.
Prezident matbuot xizmatining xabar qilishicha, korxonada Umumiy qiymati 1,7 milliard dollar bo‘lgan ushbu quvvatlar Xitoy, Yaponiya va Shveysariya bilan hamkorlikda barpo etilmoqda. Bular «Polivinilxlorid, kaustik soda va metanol ishlab chiqarish majmuasini qurish», «Ammiak va karbamid ishlab chiqarish quvvatlarini qurish» va «Azot kislotasini ishlab chiqarishni tashkil etish» loyihalaridir.
Birinchi loyiha Xitoyning «China CAMC Engineering CO. Ltd» kompaniyasi bilan hamkorlikda amalga oshirilmoqda. U mamlakatimiz kimyo sanoati uchun yangi turdagi mahsulotlar — 100 ming tonna polivinilxlorid, 75 ming tonna kaustik soda va 300 ming tonna metanol ishlab chiqarish imkonini beradi. Ushbu majmua ishga tushirilgach, 900 dan ortiq ish o‘rni yaratiladi.
Yaponiyaning «Mitsubishi Corporation» va «Mitsubishi Heavy Industries Ltd.» kompaniyalari bilan hamkorlikdagi ikkinchi loyiha doirasida eskirgan, ko‘p energiya talab qiladigan uskunalarni zamonaviysiga almashtiriladi. Majmuada yiliga 660 ming tonna ammiak va qariyb 580 ming tonna karbamid ishlab chiqariladi. Bugungi kunda bu yerda zamonaviy texnikalar jalb etilgan holda 40 ta asosiy ob’ekt qurilishi davom etmoqda.
Shveysariyaning «CASALE SA» kompaniyasi bilan hamkorlikda tashkil etilayotgan uchinchi majmua 500 ming tonna xaridorgir mahsulot ishlab chiqarish imkonini beradi.
Davlat rahbari loyihalar doirasida amalga oshirilgan ishlarni yuqori baholadi. Belgilangan reja va vazifalar ijrosini o‘z vaqtida ta’minlash, energiya tejamkor va mahsuldor texnologiyalarni qo‘llash orqali mahsulotlar raqobatbardoshligini oshirish, kimyo tarmog‘i korxonalarini rivojlantirish bo‘yicha topshiriqlar berdi.
Shavkat Mirziyoyev chet ellik quruvchi va muhandislar bilan muloqot qildi.
O‘zAning aniqlik kiritishicha, 1964 yilda ochilgan «Navoiyazot» tomonidan qishloq xo‘jaligi, neft-gaz, energetika va tog‘ sanoati uchun 70 turdagi mahsulotlar ishlab chiqariladi.
