O‘zbekiston Milliy axborot agentligi (O‘zA) Moliya vazirligi tizimida 500 dan ortiq kishining ishdan bo‘shatilgani to‘g‘risida xabar qildi. Ommaviy ishdan bo‘shatishlar Prezident Shavkat Mirziyoyevning 22 dekabrda parlamentga murojaatnomasida keskin tanqididan so‘ng boshlandi. «Yoshlar kerak, tajriba muhim emas, asosiysi millatidan qat’i nazar Vatanni sevsin», — degan edi davlat rahbari (video).
O‘zA o‘z xabarida shunday yozadi: «Sobiq Moliya vaziri va Xodimlar boshqarmasining sobiq boshlig‘i panohida bo‘lgan va hanuzgacha tizimda ishlab kelayotgan, moliya tizimining nomiga dog‘ tushirayotgan «kalamushlar"ni haydash yuzasidan hududiy rahbarlarga qat’iy topshiriqlar berilgan».

23 dekabr kuni Toshkent shahar davlat moliyaviy nazorati boshqarmasi boshlig‘i hamda uning 3 nafar o‘rinbosarlari egallab turgan lavozimidan chetlashtirildi.

Shundan so‘ng, Moliya vazirligining hududiy boshqarma boshliqlari tomonidan joylardagi moliya idoralaridan 273 nafar (23 nafari rahbar xodimlar), G‘aznachilik idoralaridan 65 nafar (12 nafari rahbar xodim), Pensiya jamg‘armasidan 100 nafar (1 nafari rahbar xodim), Davlat moliyaviy nazorati boshqarmalari xodimlaridan 100 nafari (4 nafari rahbar xodim) jami moliya tizimi bo‘yicha 562 nafar davlat idorasi nomiga dog‘ tushirgan xodimlar o‘z lavozimidan ozod etildi.

Moliya vazirligi tizimidagi vakant ish o‘rinlarini innovatsion g‘oya va fikrga ega, zamonaviy texnologiyalarni yaxshi o‘zlashtirgan, iqtidorli yoshlar bilan to‘ldirish maqsadida O‘zbekiston Yoshlar ittifoqi hamda iqtisodiy yo‘nalishdagi oliy o‘quv yurtlariga murojaatlar yuborildi.