O‘zbekiston Prezidenti Shavkat Mirziyoyev 19 oktyabr kuni Qirg‘iziston tashabbusiga ko‘ra Qirg‘iziston Prezidenti Almazbek Atamboyev bilan telefon orqali muloqot qildi, deya xabar berdi O‘zA.
O‘zbekiston rahbari muloqot avvalida Qirg‘iziston Prezidenti Almazbek Atamboyev hamda qardosh qirg‘iz xalqini joriy yil 15 oktyabr kuni prezidentlik saylovining muvaffaqiyatli o‘tkazilgani bilan samimiy muborakbod etdi.
Umumxalq saylovi natijalari Qirg‘izistonda amalga oshirilayotgan islohotlar va ro‘y berayotgan o‘zgarishlarga mamlakat aholisi yuksak ishonch bildirishi va uni har tomonlama qo‘llab-quvvatlashidan dalolat ekani alohida qayd etildi.
Ikki davlat rahbarlari yaqinda bo‘lib o‘tgan oliy darajadagi o‘zaro tashriflar chog‘ida erishilgan kelishuvlar va imzolangan bitimlarni amalga oshirish borasidagi ikki tomonlama hamkorlikning dolzarb masalalarini an’anaviy do‘stlik va amaliy ruhda atroflicha muhokama qildi.
O‘zbekiston — Qirg‘iziston davlat chegaralarining qolgan uchastkalariga oid tegishli shartnomani huquqiy jihatdan rasmiylashtirish va imzolash jarayonini tezroq yakunlash, shuningdek, chegara o‘tkazish punktlarining samarali faoliyatini ta’minlashdan ikki tomon ham manfaatdor ekani ta’kidlandi.
Transport-kommunikatsiya tizimidagi o‘zaro aloqalar, xususan, shu oyning oxiriga rejalashtirilgan «Toshkent — Andijon — O‘sh — Irkeshtom — Qoshg‘ar» yo‘nalishi bo‘yicha hamkorlikda avtomobil qatnovini sinovdan o‘tkazish muhim ahamiyatga ega ekani qayd etildi.
Qirg‘iziston Prezidenti Almazbek Atamboyev Prezidentimiz Shavkat Mirziyoyevga prezidentlik saylovi munosabati bilan samimiy tabrik uchun chuqur minnatdorlik bildirdi.
Qirg‘iziston mamlakatlar o‘rtasida keng ko‘lamli va o‘zaro manfaatli hamkorlikni bundan buyon ham rivojlantirishga, do‘stlik va strategik sheriklik aloqalarini mustahkamlashga tayyor ekanini ta’kidladi.
