Andijon davlat universiteti qoshidagi 4-akademik litsey hududida Andijon shahrida Muhammad Yusuf nomidagi ona tili va adabiyot fanini chuqurlashtirib o‘qitishga ixtisoslashtirilgan maktab va shoir byusti o‘rnatilgan xiyobon paydo bo‘ladi.
Bu haqda Vazirlar Mahkamasining 25 iyuldagi qarorida so‘z boradi, deb xabar qildi Norma.uz.
2017—2018 o‘quv yilida 5−8-sinflar, 2018—2019 o‘quv yilidan esa — 5-sinfga 30 nafardan o‘quvchi qabul qilinadi. 1 sentyabrga qadar 150 o‘ringa mo‘ljallangan o‘quv binolarida ta’mirlash ishlari amalga oshirilib, yondash hududda bog‘ barpo etiladi.
Yangi maktab o‘quv-laboratoriya jihozlari, kompyuter texnikasi, o‘quv-metodik majmualar, darsliklar va badiiy adabiyotlar bilan ta’minlanadi.
Maktabga iqtidorli o‘quvchilarni saralab olish maqsadida ona tili va adabiyot fanlaridan, shuningdek psixologik-pedagogik diagnostika bo‘yicha test sinovi o‘tkazish ko‘zda tutilgan.
