Rio-de-Janeyroda Olimpiya o‘yinlari g‘olibi Hasanboy Do‘smatov O‘zbekistonda yilning yaxshi sportchisi deb tan olindi. Madaniyat va sport ishlari vazirligi poytaxtdagi “Sayohat” mehmonxonasida madaniyat va sport vakillarini taqdirladi.
Boks bo‘yicha milliy terma jamoa a’zosi Hasanboy Do‘smatov “Yilning eng yaxshi sportchisi” nominatsiyasida g‘olib bo‘ldi, deb xabar qilindi “Gazeta.uz"ga. unga maxsus diplom va 10 ming AQSH dollari miqdoridagi pul mukofoti taqdim etildi.
“Ko‘plar kareramda bunday muvaffaqiyatli yildan so‘ng mening olg‘a intilishga ishtiyog‘imni yo‘qotib qo‘yishim haqida o‘ylashi mumkin. Men endigina 23 yoshga kirdim, yanada kuchayishda davom etaman va umid qilamanki, o‘z mamlakatim uchun ko‘proq medallarni qo‘lga kiritaman. Birinchi navbatda bu medallar jahon chempionati va Osiyo o‘yinlariniki bo‘ladi. Ishonch bilan ayta olamanki, oldinda bizni yanada yirikroq g‘alabalar va muvaffaqiyatlar kutmoqda”, — dedi Hasanboy Do‘smatov.
AIBA Pro Boxing versiyasi bo‘yicha jahon chempioni Xurshid Tojiboyev “Eng faol sportchi” deb topildi. Milliy Olimpiya qo‘mitasi Prezidenti Mirabror Usmonov “Sport sohasi rivojiga qo‘shgan ulkan hissasi uchun” nominatsiyasida mukofotga ega bo‘ldi.
Foto: mcs.uz.
Sportning qishki va murakkab texnik turlari bo‘yicha respublika oliy sport mahorat maktabi direktori Atxam Yunusov, Sport o‘yinlari bo‘yicha respublika oliy sport mahorat maktabi direktori Iskandar Jo‘rayev, O‘zbekiston milliy paralimpiya assotsiatsiyasi raisi o‘rinbosari Umid Ahmadjonov, O‘zbekiston Milliy olimpiya qo‘mitasi bosh kotibi Oybek Qosimov, Yakkama-yakka kurash bo‘yicha respublika oliy sport mahorat maktabi direktor o‘rinbosari Akramjon Nizomitdinov va Yakkama-yakka kurash bo‘yicha respublika oliy sport mahorat maktabi yo‘riqchi-uslubchisim Amir Sa’dulloyev “Sport sohasi rivojiga qo‘shgan hissasi uchun” rag‘batlantirildi.
