Humo Arena`да ўтаётган дзюдо бўйича Жаҳон чемпионатининг финални томоша қилишга президент Шавкат Мирзиёев борди. -90 кг вазн тоифасида беллашган Ўзбекистон вакили Давлат Бобоновнинг италиялик Кристиан Парлати устидан ғалаба қозониб, жаҳон чемпионига айланди. Унга олтин медални президентнинг шахсан ўзи тақиб қўйди. «Газета.uz» финал учрашувидан репортаж тайёрлади.
Беллашув давомида рақиблар балл қўлга киритмади. Италиялик дзюдочининг хатолари сабаб унга 3 та огоҳлантириш берилди.
Дзюдо қоидасига кўра, 3 та шидо олган спортчи мағлуб бўлган ҳисобланади. Шу тариқа Ўзбекистонда ўтаётган жаҳон чемпионатининг бешинчи кунида биринчи бор ўзбекистон спортчи медални қўлга киритди.
Беллашувдан сўнг Давлат Бобонов журналистларга интервью берди.
«Мен ярим финалда ютганимда бош вазир Абдулла Арипов келиб шахсан президентнинг ўзи финал баҳсини кузатишини айтди. Бу спортчи учун жуда ҳам катта мотивация. Финалга шу гапни эшитиб чиқдим. Президент томоша қилиб ўтирганидан кейин ютқазишга ҳаққим йўқ эди. Умуман олганда жаҳон чемпионатида иккинчи марта курашишим. Ўтган йили Венгрияда ўтган чемпионатда финалда ютқазгандим. Жорий йилда шу 100 фоиз босим бўлиб турган бўлса, бу [президентнинг кузатиши] яна ҳам босим бўлди. Аллоҳга шукур, уддаладик», — деди у.
Шунингдек, жаҳон чемпиони мусобақа давомида финалгача курашган энг кучли рақибидан реванш олгани ҳақида гапириб ўтди:
«Финалгача курашган рақибларим орасида энг кучлиси бу Токио олимпиадасида омадни бой бериб қўйган рақибим грузиялик Бекаури бўлди. Уни ярим финалда енгдим. У билан ҳисобимиз биру бир эди. Мана бугун шу олимпиаданинг реванши олинди. Ҳамма билан кураш бир хил кечди. Унга [Бекаурига] нисбатан сал кўпроқ тер тўккан бўлишим мумкин. Чунки, аламим бор эди. Сабаби, Ҳансукига олимпиадада ютқизган эдим. У мени йиқитмаган бўлса ҳам. Ичимда аламим ва агрессия бор эди. Ҳозир эса ҳеч нимани ҳис қилмаяпман (кулади)».
