22 июнь куни Ангрен-Поп электрлаштирилган темир йўли ҳамда Қамчиқ туннелининг расмий очилганига роппа-роса бир йил тўлди. Бир йил муқаддам Ўзбекистоннинг биринчи Президенти Ислом Каримов ва Хитой Халқ Республикаси Раиси Си Сзинпин расмий очилиш маросимида иштирок этиб, «Ўзбекистон» йўловчи поездининг Қамчиқ туннелидан ўтишига рухсат берувчи семафорни ёқиш учун махсус тугмани босган эди.
Ангрен — Поп электрлаштирилган темир йўл линиясини барпо этишдан мақсад нафақат Фарғона водийси вилоятлари ва мамлакатнинг бошқа ҳудудлари ўртасида темир йўл орқали юк ва йўловчи ташиш имкониятини яратиш, шу билан бирга, Хитой — Марказий Осиё — Европа янги халқаро транзит темир йўл коридорининг энг муҳим бўғини бўлиши ҳам назарда тутилган эди.
Узунлиги 123,1 километр бўлган Ангрен — Поп темир йўлининг Қамчиқ довонидан ўтган қисмида 19,2 километрлик туннель барпо этилди.
Бугунги кунда ушбу темир йўл орқали Тошкент — Андижон — Тошкент йўналишида ҳар куни замонавий тезюрар йўловчи поэздлари аҳолига хизмат кўрсатмоқда. Андижон — Бухоро — Андижон йўналишида ҳафтасига иккита йўловчи поезди, ҳафтада бир маротаба Андижон — Урганч — Андижон, Андижон — Москва — Андижон йўналишларида йўловчи поездлари қатнови ташкил этилди. Бундан ташқари, бир суткада ўнлаб юк поезди Ангрен — Поп электрлаштирилган темир йўли орқали ўтиб, юкларни ўз манзилига етказмоқда.
«Ўзбекистон темир йўллари» акционерлик жамияти ахборот хизматининг хабар қилишича, мазкур темир йўл орқали шу кунгача 413162 нафардан ортиқ йўловчига хизмат кўрсатилди, 7,396 млн тонна юк ташилди. Шунингдек, 1718 та янги иш ўрини яратилди.
