Самарқанд вилоятининг Пастдарғом туманида хандақ қазилгач, қўшни уй қулаб тушди. Бу бўйича тармоқларда тарқалган видеоларга Қурилиш ва уй-жой коммунал хўжалиги вазирлиги муносабат билдирди.
Келтирилишича, мазкур объект туманнинг «Самарқанд» МФЙ Самарқанд кўчасида жойлашган нотурар жой ҳисобланади. Воқеа сабабли кўрилган зарар ёки жароҳатланиш ҳолатлари бор-йўқлигига аниқлик киритилмаган.
Фото: Kun.uz
«Ҳақиқатан ҳам, хандақ қазиш жараёнида нотўғри йўл тутилгани боис қўшни уйга зарар етган», дея таъкидлаган вазирлик воқеага боғлиқ қўшимча маълумотларни ўрганишини маълум қилди.
Kun.uz Бош прокуратура матбуот хизматига таяниб, воқеа бўйича Жиноят кодексининг 173-моддаси 2-қисмининг «в» банди (мулкни атрофдагилар учун хавфли усулда қасддан нобуд қилиш ёки унга зарар етказиш) билан жиноят иши қўзғатилгани ҳақида хабар берди.
15 май куни қулаб тушган уй эгаси Ҳасан Муродуллаев ҳуқуқни муҳофаза қилиш органларига ариза билан мурожаат қилиб, унинг қўшниси Тохиржон Бегматов дўкон қурилиши учун ҳандақ қазганини, уй қулаб тушишидан қўрқиб, қурувчиларга қазиш ишларини тўхтатишни, акс ҳолда уй қулаб тушишини бир неча бор айтиб келганини билдирган.
Унинг талаблари эътиборга олинмаган ва 14 май куни соат 19:45 атрофида бино қулаб тушган. Уй эгаси унга етказилган зарарни 300 минг АҚШ долларига баҳолади.
